iklan

NASIONÁL, POLÍTIKA

PNDS husu benefisiáriu UNP+ B uza zinku-labele faan fali

PNDS husu benefisiáriu UNP+ B uza zinku-labele faan fali

Ministru Administrasaun Estatál, Miguel Pereira de Carvalho, entrega zinku ba benefisiáriu Uma naroman ba Povu Plus B iha Covalima. Imajen Tatoli/Celestina Teles.

DILI, 13 fevereiru 2023 (TATOLI)–Governu liuhosi Sekretáriadu Téknika Programa Nasionál Dezenvolvimentu Suku (PNDS), Claudinha Soares Pinto, PNDS husu benefisiáriu Uma Naroman ba Povu Plus B (UNP+ B) tenke uza zinku ne’e hodi troka ba uma kakuluk ne’ebé feruzen no labele faan fali.

Secretaria Ezekutiva ST-PNDS, Claudinha Soares Pinto. Imajen Tatoli/Francisco Sony

“Ba ita-boot sira-ne’ebé mak simu zinku ne’e tenke taka no troka ba imi-nia zinku ne’ebé feruzen no ko’ak, atensaun labele faan fali kalen no labele halo buat seluk. Tanba, xefe suku sira hamutuk ho ekipa kontinua halo monitorizasaun para depois garante katak ita-boot sira taka duni kalen ne’ebé simu ne’e,” Claudinha Soares Pinto hateten ba jornalista sira, hafoin partisipa lansamentu konstrusaun Uma Naroman ba Povu (UNP) iha suku Camea, segunda ne’e.

Ida-ne’e mak VIII Governu Konstitusionál nia programa ne’ebé mak nia intensaun atu konkretiza ninia funsaun iha nasaun RDTL, katak povu tenke hela iha fatin ne’ebé mak di’ak no dignu, hodi nune’e sira bele tahan hosi loron nia manas no sira bele hala’o sira-nia moris ho dignu liuhosi hela iha uma dignu.

Prezidente Autoridade Munisípiu Dili (AMD), Guilhermina Filomena Sladanha Ribeiro, reforsa tan katak zinku ne’ebé governu oferese ne’e tenke truka duni uma ne’ebé koak labele lori ba faan.

“Buat ne’ebé ita-nia governu fahe ba ita-boot sira tenke uza tuir ita-boot sira-nia nesesidade hanesan ita-nia zinku ko’ak no troka fali, tanba ita-nia xefe suku sira sei halo monitorizasaun ba ita-boot sira-ne’ebé mak simu ona kalen,” nia dehan.

Programa Uma Naroman ba Povu Plus B (UNP+ B) ne’e, Parlamentu Nasionál aprova liuhosi Orsamentu Retifikativu ho montante millaun $25.

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!