PR Horta husu líder nasionál unidu

DILI, 13 fevereiru 2023 (TATOLI)—Prezidente Repúblika (PR), José Ramos Horta, husu líder nasionál sira hotu atu unidu atu hetan konsensu estratéjiku halo buat hotu-hotu ne’ebé konsidera interrese nasionál no internasionál.

Notísia Relevante: Prezidente Repúblika dekreta loron eleisaun Parlamentár iha 21 maiu

“Ba na’in-ulun líder nasionál sira hotu-hotu, ita hotu, ha’u husu ita unidu. Ha’u husu hamutuk, nune’e ita halo konsertasaun estratéjika, hetan konsensu estratéjiku haleu buat hotu-hotu ne’ebé ita konsidera kestaun interrese nasionál no internasionál ne’ebé importante,” Xefe Estadu, Jos’e Ramos Horta hateten liuhosi konferénsia imprensa hodi dekreta loron eleisaun parlamentár 2023 iha Palásiu Prezidensiál Nicolau Lobato, Bairru Pite, segunda ne’e.

Nia hateten, povu no mundu hakarak haree lideransa polítika ida sai lejitimadu hosi eleisaun livre no transparente, governasaun dinámiku, kompetente no sériu.

“Hakarak haree lideransa ida sai hosi eleisaun ida la’o di’ak, moos no eleisaun prodús governasaun ida dinámiku tebe-tebes ho ema matenek no ho seriedade,” nia hateten.

Tanba razaun sira-ne’e, nia dehan, aleinde rona partidu sira hotu no entidade sira seluk mak nia-parte deside marka loron eleisaun parlamentár 2023 nian.

Loron marka eleisaun ne’e mós haree preokupasaun importante tebes ita bele halo rekuperasaun ekonomika ne’e urjente.

“Fiar povu mobiliza eleisaun parlamentár, ha’u fiar lideransa polítika nasionál no hatene sei hetan konsensu no sei ka’er konsesu ida ne’e. Desizaun ida-ne’e, ha’u halo depois hanoin sukat buat hotu-hotu,” nia dehan.

Xefe Estadu, mós fiar  katak iha prosesu kampaña eleitorál ne’ebé sei akontese ne’e, partidu polítiku sira konsentra de’it ba programa.

Jornalista : Nelson de Sousa

Editór      : Cancio Ximenes