VIQUEQUE, 13 janeiru 2023 (TATOLI)– Xefe suku Uaitame, postu Uatulari, munisípiu Viqueque, José do Rosário, informa abitante aldeia Sana hamutuk uma-kain 86 seidauk asesu ba ahi eletrisidade.
“Iha ha’u-nia suku Uaitame ne’e abitante iha aldeia Sana mak seidauk asesu ba eletrisidade, nune’e tempu kalan difikulta populasaun sira tanba atu hetan naroman tenke tuku kamii, balun iha kbi’it uza solár panel. Tan ne’e nu’udar autoridade lokál husu ha Governu presiza tau matan ba pupulasaun atu sira mós bele asesu ba ahi eletrisidade”, hateten Xefe Suku José do Rosário, ba Agência Tatoli, iha suku Uaitame, segunda ne’e.
Autoridade suku Uaitame ne’e hatutan iha tinan 2016 esforsu autoridade hato’o proposta ba ministériu relevante hodi loke konkursu ba empreza sira, maibé seidauk mai hala’o.
“Bainhira ami mosu iha komunidade sira-nia leet, komunidade sira sempre kestiona bei-beik eletrisidade ba ami. Tanba ne’e, iha oitavu Governun nian mandatu ne’e bele dada eletrisidade ba ha’u-nia populasaun sira atu responde populasaun nia-halerik ba ahi-eletrisidade”, nia hato’o.
Alende ne’e nia husu ba Prezidente Eletrisidade de Timor Leste, Empreza Públiku (EDTL,E.P), tau konsiderasaun ba populasaun sira ne’ebé seidauk asesu eletrisidade ne’e hodi tau ba projetu komunitáriu, nune’e populasaun sira bele asesu ba naroman.
Tuir dadús abitante husi suku Uaitame iha área rua maka seidauk asesu ba eletrisidade hanesan aldeia Sana ho uma-kain 86 no aldeia Uailalika ho uma-kain hamutuk 55.
Jornalista :Vitorino Lopes da Costa
Editór : Florencio Miranda Ximenes
