2022: SMJMT Covalima kontribui ona reseita $2,250,55 ba kofre Estadu

COVALIMA, 14 fevereiru 2023 (TATOLI)–Diretór  Servisu  Munisípal Jestaun Merkadu no Turizmu Covalima, Vitorino do Carmo, relata hahú janeiru to’o dezembru tinan 2022 liubá ne’e SMJMT kontribui reseita $2,250,55 ba kofre Estadu.

“Hahú janeiru-dezembru 2022 ne’e,  ami kontribui reseita $2,250,55 ba kofre Estadu ne’ebé fonte mai hosi kompañia sira monta públisidade iha munisípiu Covalima ho tipu hanesan avenida, travesa no beco,” Vitorino do Carmo hateten ba Agência Tatoli, iha Bairru Costa, tersa ne’e.

Reseita ne’e kontribui liuhosi kompaña sira-ne’ebé monta públisidade iha Covalima hosi kompañia hamutuk 12 ho totál orsamentu $2,250,55 ba kofre Estadu ne’ebé kompañia sira selu tinan ida dala ida.

Prosesu kompañia sira selu direta iha banku bazea ba kompañia sira monta públisidade tuir nia medida kada metru kuadradu ho tipu estrada avenida metuo kuadradu ida selu sentavu $0,40, iha rua ne’e selu sentavu $0,30, travesa ne’e ho folin sentavu $0,20 no iha Beco ne’e ho folin sentavu $0,10.

Kompañia sira-ne’ebé monta públisidade depende sira-nia estabelesimentu hanesan hakarak tau iha avenida ne’e depende kompañia sira liuhosi sira hato’o pedidu.

Kritériu kompañia sira atu monta públisidade sira tenke husu lisensa iha Servisu Munisipál Jestaun Merkadu no Turizmu (SMJMT).

Kompañia 12 ne’ebé kontribui reseita liuhosi públisidade mak hanesan kompañia Silmanizia Unipesoál, Lda, Yestoya Motor Unipesoál, Lda, Caixa Jerál Depozitu, Ofisina Aristabere enin, kompaña Lotaria Bed, Timor Telekom, Telemor, Telkomcel, Wujie Peise Unipesoál, Lda, Nesjian Yizhong Yun, Mao Fa Unipesoál, Lda, Lotaria Amizade, Los Hermanos Unipesoál, Lda, Owen Big Wang UUnipesoál, Lda, Eastern Dragon Unipesoál, Lda, YY Guizheng Fengmei, Nefran Boycall, Global Full Station unipesoál, Lda, no Heinken.

Jornalista : Celestina Teles

Editór       : Cancio Ximenes