Autoridade Baucau no CNE deside fatin rua ba kampaña eleitorál
Baucau, 14 fevereiru 2023 (TATOLI) – Autoridade munisípiu Baucau no Komisaun Nasionál Eleisaun (CNE, sigla portugés), deside fatin rua ba kampaña eleitorál tinan 2023 nian.
Diretór CNE munisípiu Baucau, Esmeraldo Damião Belo, esplika, hafoin prezidente repúblika dekreta loron eleisaun, CNE sei halo koordenasaun serbisu ho Sekretariadu Tékniku Administrasaun Eleitorál (STAE) munisípiu Baucau no halo preparasaun ba atividade edukasaun sívika, identifika fatin kampaña liuhosi koordenasaun ho autoridade munisipál Baucau.
“Ida-ne’e hanesan faze preparasaun CNE Baucau hodi hasoru eleisaun parlamentár mai,” Diretór CNE informa ba Agência TATOLI iha Vila Nova, tersa ne’e.
Liuhosi enkontru interna entre CNE ho Autoridade administrasaun Baucau define fatin rua ba partidu polítiku sira hodi halo kampaña eleitóral hanesan kampu Darsula no Gariuai, suku Gariuai, postu administrativu Baucau vila ho razaun hodi evita konflitu entre militante partidu sira iha tempu kampaña.
Alende ne’e, harii ekipa kompostu lideransa partidu iha munisípiu, autoridade seguransa hanesan Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) hodi estabelese komunikasaun liuhosi K3 katak koordenasaun, kooperasaun no kontaktu hodi kria pás no estabilidade durante tempu kampaña iha Baucau.
“Sei halo paktu dame oinsá mak ko’alia sukat liafuan, labele hatún malu, liuliu foku ba programa maibé ne’e sei iha planu no programa ne’ebé mak sei implementa iha tempu eleisaun,” Esmeraldo Belo akresenta.
CNE Baucau sei halo esforsu hotu hodi evita konflitu durante kampaña eleitótal tanba haree ba esperiénsia eleisaun prezidensiál tinan-2022 ne’ebé kuaze partidu polítiku sira sala utiliza oráriu kampaña nune’e hamosu konfrontantasaun entre militante iha Baucau.
Nune’e, CNE Baucau kompromete sei kontinua halo kontaktu ho lideransa partidu polítiku iha munisípiu Baucau atu garante seguransa internalmente iha tempu kampaña ho objeitu kria pás no estabilidade durante realizasaun eleisaun parlamentár iha tinan-2023.
Jornalista : Natalino Belo
Editór : Evaristo Soares Martins
