CNE Baucau sei rekruta ofisiál superviziona kampaña eleitorál no eleisaun parlamentár

BAUCAU, 14 fevereiru 2023 (TATOLI) – Komisaun Nasionál Elisaun (CNE, sigla portugés) sei rekruta ofisiál na’in-180, hodi superviziona kampaña eleitorál no eleisaun parlamentár tinan 2023.

Diretór CNE Baucau, Esmeraldo Damião Belo, esplika, relasiona ho Prezidente Repúblika dekreta ona kona-ba loron elisaun parlamentár tinan-2023 ne’ebé sei halao iha fulan-maiu, CNE Baucau sei halo rekrutamentu kandidatu ofisiál supervizaun eleisaun hodi hasoru festa demokrasia iha tinan 2023 ne’e.

“Ita sei tais liuhosi teste eskrita no orál ne’ebé sei presiza hamutuk na’in-180 hodi koloka ba sentru no estasaun votasaun iha munisípiu Baucau,” Diretór CNE informa ba Agensia TATOLI iha vila nova, tersa ne’e.

Kandidatu ne’ebé subemete ona dukumentu hamutuk na’in-581 kompostu hosi postu admistrativu neen iha munisípiu Baucau ne’ebé sei hala’o selesaun no sei liuhosi prosesu teste.

Rezultadu teste sei anunsia hosi nasionál, bazea ba númeru ne’ebé presiza iha baze tuir sentru no estasaun votasaun nune’e parte munisípiu iha devér halo selesaun dokumentu no hein rezultadu teste sei fó sai hosi nasionál.

Prosesu rekrutamentu ofisiál superviziona eleisaun bazea establesementu hosi STAE munisípiu Baucau tanba ajusta tuir ba totál sentru no estasaun votasuan ne’ebé sei hala’o iha tempu eleisaun parlamentár tinan-2023 mai.

“Atualmente selesaun dokumentu determina ona maibé seidauk fó-sai ba publiku no hein orieintasaun hosi nasionál hodi fó sai dala-ida iha teritóriu nasionál tuir kada munisípiu,” Esmeraldo Belo akresenta.

Antes ne’e, iha loron-13 fevereiru, Prezidente Repúblika José Ramos Horta fó sai ona data eleisaun parlamentár ne’ebé sei realiza iha loron 21 fulan-maiu tinan-2023.

Jornalista    : Natalino Belo

Editór           : Evaristo Soares Martins