EDTL, E.P rejistu kliente 22 halo ligasaun ilegál ba liña eletrisidade

DILI, 14 fevereiru 2023 (TATOLI)— Eletrisidade de Timor-Leste, Empreza Públika (EDTL,E.P) hahú hosi tinan 2022 to’o  agora rejistu kliente 22  halo ligasaun ilegál ba liña eletrisidade.

“Hosi total 22 ne’e, sura hosi  tinan 2022  rejistu kliente halo ligasaun ilegál 20 resin no  tinan 2023 ita rejistu tan kliente na’in rua mak  halo tan ligasaun ilegal. Hosi númeru ne’e, sira multa osan hamutuk $173.000 ba kofre Estadu,” Komisáriu Ezekutivu Servisu Tékniku no Volgal Konsellu Adminitrasaun, EDTL,E.P, Latino Jerónimo dehan ba Agência Tatoli, iha nia-knaar fatin, Caicoli, Dili, tersa ne’e.

Nia dehan, kliente sira ne’e, bele selu to’o $173.000 tanba kliente 20 ne’ebé komete iregularidade iha 2022 ne’e selu $150.000 no kliente na’in rua ba 2023 ne’e bele selu to’o $23.000.

Nia esplika, sansaun ne’ebé EDTL,E.P fó ba kliente sira selu multa ne’e bazeia ba kliente sira-nia dizultór amper.

“Osan ne’ebé sira multa la selu iha EDTL,E.P maibé selu direitamente ba banku. Osan sira ne’e direitamente hatama ba Kofre Estadu,” Latino hateten.

Nia afirma, ko’alia kona-ba ligasaun iha buat rua ne’ebé diferente mak, ligasaun direita no ilegál. Ligasaun direita signifika antes Diresaun EDTL transforma ba Empreza Públika iha kliente 95.000 halo ligasaun direita tanba laiha duni kontadór, tanba momentu orsamentu mak la to’o atu sosa kontadór, ho nune’e  la kobre hotu entaun sira halo ligasaun direita ida ne’e la’os kulpa kliente nian.

“Kona-ba ligasaun ilegál ne’e, signifika ita monta tiha ona kontadór maibé kliente rasik hakarak desliga halo ligasaun illegal. Ho idan e’e,  ita identifika regulariza, no penaliza sira tuir dekretu lei númeru 33/2016 17 agostu kona-ba regula enerjia no tarefa eletrisidade,” nia dehan.

Jornalista : Arminda Fonseca

Editora      : Armandina Moniz