EDTL,E.P monta kontadór prepagu ba uma-kain 281.000 iha territóriu nasional
DILI, 14 fevereiru 2023 (TATOLI)—Eletrisidade de Timor-Leste, Empreza Públika (EDTL,E.P), daudaun ne’e monta ona kontadór prepagu ba uma-kain nivel nasional hamutuk 281.000.
“Kontadór prepagu ne’ebé ita instala ona ba komunidade uma-kain iha territóriu laran hamutuk 281.000,” Komisáriu Ezekutivu Servisu Tékniku no Vogal Konsellu Administrasaun, EDTL,E.P, Latino Jerónimo hateten ba Agência Tatoli, iha nia-knaar fatin, Caicoli, Dili, tersa ne’e.
Nia dehan, ba Projetu Eletrifikasaun Nasional (PEN) ne’ebé daudaun la’o hela hamutuk 127 projetu hosi númeru ne’e, kobre ba suku hamutuk 59.
“Hosi projetu ne’e, suku ne’ebé asesu ona ahi ne’e hamutuk 20 inklui aldeia 66. Hosi projetu 127 komunidae ne’ebé sei asesu ba ahi ne’e hamutuk 28.000 maibé sira balu ita seidauk monta kontadór prepagu tanba ahi lakan, ita sei fó fulan neen gratuita ba sira uza hafoin ba monta kontadór,” nia dehan.
Nia afirma, hosi suku 59 ne’e EDTL,E.P promove hotu ona, no liuhosi pakote 34 kobre suku 23, pakote 44 (suku 17) no pakote 36 (suku 23), no pakote ikus foin lansa ba suku tolu, mak hanesan Fatukalu iha munisipiu Manufahi, suku Nanu’e (Covalima) no suku Fatumakerek (Manatuto).
Suku tolu ne’e, lansa ona no nia prosesu no agora iha hela avaliasaun hodi to’o ba konkursu públiku.
Nia dehan, pakote ba suku sira remata ona agora hela mak aldeia 290 resin mak seidauk asesu ba liña eletrisidade. Aldeia sira ne’e daudauk ekipa hamutuk ho lideransa komunitániu halo hela identifikasaun ba uma no distansia.
“Bainhira ita indetifika mak distansia besik kilometru ida ka rua hosi estrada boot, maka ekipe sei tun direttamente servisu hamutuk no komunidade dada liña eletrisidade liu hosi Programa Elinikasaun Komunitariu (PEK) Maibe haree ba distánsia dook liu kilómetru rua ita sei lori ba konkursu púbiku,” Latino dehan.
Jornalista : Arminda Fonseca
Editora : Armandina Moniz
