HNGV sei haruka profisionál saúde 13 ba estuda iha Fiji no Kuba
DILI, 14 fevereiru 2023 (TATOLI) – Hospitál Nasionál Guido Valadares (HNGV) iha tinan ne’e haruka profisionál saúde hamutuk 13 ba nasaun Fiji no Kuba hodi kontinua estuda iha área espesialidade nian durante tinan haat.
“Ami haruka profisionál saúde hamutuk 11 ba nasaun Fiji hodi kontinua estuda iha área espesialidade ba atendimentu emerjénsia, unidade kuidadu intensivu, pediatria sirurjia, medisina interna no anestesia no na’in rua seluk ba estuda sub espesialista iha nasaun Kuba”, Diretór Ezekutivu HNGV, Alito Soares informa ba TATOLI, ohin.
Nia rekorda, profisionál saúde balun haruka ona iha 2022 no balun mak sei haruka iha tinan ne’e hodi ba estuda iha área espesialidade ne’ebé HNGV iha.
“Sira ne’e ita haruka anualmente ba tuir kusru espesializada atu bele responde servisu saúde nian iha HNGV”, nia hateten.
Alito Soares adianta, profisionál saúde sira ne’e kontinua sira-nia estudu atu bele responde ba pakote emerjénsia tanba HNGV presiza rekursu umanu ne’ebé adekuadu ba unidade ospitál iha HNGV.
“Ha’u garante, ita kontinua investe rekursu umanu tanba agora HNGV kontinua enfernta problema infrestrutura no ekipamentu maibé Governu nafatin tau atensaun ba ida ne’e entaun haruka nafatin profisionál saúde ba estuda área espesializada sira hodi bele fila fali mai halo atendimentu ne’ebé di’ak ba ita nia populasaun”, nia afirma.
HNGV aloka orsamentu hamutuk 900 mil hodi haruka profisonál saúde ba estuda ninia espesialidade iha nasaun Fiji no Kuba.
Tuir dadus husi Ministériu Saúde katak profisionál saúde ne’ebé mak daudaun eziste iha Timor -Leste hamutuk 5.525 no médiku espesialista hamutuk 101.
Jornalista : Felicidade Ximenes
Editór : Zezito Silva
