MAP presiza guarda floresta 1.500 hodi kontrola rekursu ai-laran
DILI, 14 fevereiru 2023 (TATOLI)— Ministériu Agrikultura no Peska (MAP) liuhosi Diresaun Jerál Floresta Kafé no Planta Industria, Raimundo Mau, hateten sira-nia parte presiza guarda floresta hamutuk 1.500 hodi kontrola rekursu ai-laran iha Timor-Leste (TL).
Diretór Jerál Floresta Kafé no Planta Industria, Raimundo Mau, hateten total guarda floresta rasik sura ho rekrutamentu tinan rua ikus hamutuk ho antes ne’e iha 250. Sira ne’e agora namkari iha postu administrativu sira hotu liuliu iha área ne’ebé mak presija.
“Ita presiza guarda floresta hamutuk 1.500 hodi kontrola rekursu ailaran iha territóriu laran tomak. Tanba daudaun ita iha deit guarda floresta 250 deit. Ema ida kontrola area floresta ho 500 ektare. Ida ne’e la sufisiente tanba ita iha rekursu ailaran ne’ebé presiza kuidadu ne’e hamutuk 8.600 ektare,” Raimundo Mau dehan ba Agência Tatoli iha nia knaar fatin, Caicoli, Dili tersa ne’e.
Nia dehan, ho númeru guarda floresta ne’ebé la sufisiente esforsu ne’ebé MAP halo mak aprosimasaun ho komunidade no husu timor-oan hotu sai guarda ba rekursu ai-laran. Tanba, ho ida ne’e de’it mak bele salva guarda ai-laran hahú agora nune’e bá oin eziste nafatin.
Raimundo Mau afirma, guarda floresta sira-nia prezensa iha terrenu ne’e atu fó asisténsia tékniku ba komunidade oinsá atu uza rekursu ai-laran ne’e iha forma ida ne’ebé mak sustentável. Tanba, polítika ne’ebé Governu halo mak guarda floresta sira aleinde iha kapasidade ba protesaun rekursu ai-laran maibé sira mós MAP kapasita hodi fo kbiit hamutuk ho komunidade oinsá bele influénsia komunidade bele hola parte iha protesaun rekursu ai-laran nian.
“Ita salva guarda ailaran la’os bá individu ka instituisaun ida nian. Maibé presija ema timoroan hotu ninia tulun hodi kuida no proteze rekursu ai-laran,” nia dehan.
Jornalista : Arminda Fonseca
Editora : Armandina Moniz
