DILI, 14 fevereiru 2023 (TATOLI) – Ministra Negósiu Estranjeiru no Kooperasaun (MNEK) Adalzija Albertina Xavier Reis Magno, dehan Governu Timor-Leste ofisialmente asina akordu lima ho Governu Indonézia hodi servisu hamutuk.
“Vizita ofisiál hosi Primeiru-Ministru nian mai Indonézia, ita konsege asina akordu lima ho Governu Indonézia, ida mak joint statement, ha’u rasik ho Ministra Negósiu Estranjeiru Indonézia mak asina kona-ba Governu rai rua atu harii zona ekonomia iha fronteira entre Oe-Cusse ho Indonézia nian, ida ne’e hanesan faze ida ne’ebé ita sei komesa hosi Oe-Cusse maibé ba oin ita sei komesa tan iha fronteira sira seluk”, ministra dehan hosi video ne’ebé media MNEK fó sai, ohin.
Nia esplika, iha akordu seluk ne’ebé asina mak hanesan, Ministru Transporte Komunikasaun (MTK) José Agustinho da Silva ho Agência Metrolojia Klimatolojia Jeofízika Indonézia nian atu servisu hamutuk.
Enkuantu akordu seluk mak Ministériu Ensinu Superiór Siénsia Kultura (MESSK) Longuinhos dos Santos asina ho Ministériu Edukasaun Indonézia nian atu halo kooperasaun ho Universidade sira iha Indonézia atu haruka timoroan sira ba eskola iha área oioin.
“Kooperasaun seluk mak asina hosi Ministériu Turizmu Komérsiu Indústria (MTKI) kona-ba kooperasaun iha área téknika no indústria nian, akordu ikus mak akordu entre Komisaun Nasionál Eleisaun (CNE-sigla portugés) Prezidente José Belo mak asina ho Prezidenten Komisaun Pemilihan Umum (KPU) Indonézia nian atu koalia liu ba kooperasaun no kapasitasaun ba rekursu umanu no dezenvolvimentu institusionál”, ministra ne’e hakotu.
Jornalista:Hortencio Sanchez
Editór : Zezito Silva
