DILI

UNDP kompromitidu sei lori ezemplu tinta indelevél ba STAE teste kualidade

UNDP kompromitidu sei lori ezemplu tinta indelevél ba STAE teste kualidade

Eleitór hatama liman fuan-hatudu ba tinta indelevel hafoi ezerse nia direitu votu iha Eleisaun Prezidensial 20 Marsu 2017. Imajen Tatoli/António Gonçalves.

DILI, 14 fevereiru 2023 (TATOLI)–Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten iha fulan-marsu nia klaran ne’e, Programa Dezenvolvimentu Nasaun Unidu (UNDP-sigla inglés) kompromitidu sei mai aprezenta ezemplu tinta indelevé iha STAE hodi bele teste nia kualidade.

“UNDP komprimitidu atu iha fulan-marsu nia klaran ne’e sei lori ezemplu tinta indelevél mai fó STAE atu halo teste ba tinta nia kualidade,” Diretór Jerál STAE ne’e hatete ba Agência Tatoli, iha nia kna’ar fatin, Caicoli, tersa ne’e.

Koordenadór Rezidente United Nations iha Timor-Leste, Funmi Balogun, hateten tinta idelevél ne’e sei iha faze teste nia laran molok uza iha eleisaun parlamentár 2023 ne’e.

“Agora ami tenke teste tinta ne’e. Ami teste ba tinta ne’e sei ramata iha fevereiru nia rohan, nune’e iha marsu ka abríl nia klaran ne’e sei to’o iha Timor-Leste. Ami halo ona aprovizionamentu ba ekipamentu sira no mós tinta ba eleisaun. Buat sira-ne’e mak ami hato’o no UN prontu ajuda Governu no povu TL iha eleisaun tuir mai,” nia dehan.

Koordenadór ne’e hateten, tinta indelevél ba eleisaun parlamentár 2023 ne’e ho garafa kiik-oan entre 10.500 no 12.500 sei to’o iha Timor-Leste iha fulan-marsu ka abríl nia klaran.

“Tinta ne’ebé UNDP prepara ne’e garafa entre 10.500 no 12.500 mak sei mai Timor-Leste. Iha tempu besik, tinta refere bele to’o ona iha Timor-Leste,” nia hateten.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!