ARNLV husu Estadu rekoñese timoroan militár portugés iha 20 agostu 1975
DILI, 15 fevereiru 2023 (TATOLI)—Prezidente Asosiasaun Rezisténsia Nasionál Libertasaun Veteranus (ARNLV), Eduardo da Costa, husu Estadu presiza rekoñese sira hanesan militár portugés iha 20 agostu 1975.
“Ohin, ami husu audénsia ho Prezidente Repúblika ko’alia kona-ba situasaun militár portugés timorense 20 agostu nian, ko’alia mós definisaun veteranu sira sívil no militár. Ne’ebé, ami ko’alia ho Prezidente hola atensaun, ami rai hela dokumentu sira sei kontaktu fali ho ami,” Prezidente Assosiasaun ba Libertasaun Veteranu, Eduardo da Costa, hateten ba jornalista sira hafoin hala’o audiénsia ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Pite, kuarta ne’e.
Nia dehan, problema militár portugés nian iha 20 agostu 1975 ne’e hotu-hotu mesak sarjentu, soldadu ho sira seluk tan ne’ebé halo kontra golpe.
“Dehan iha agostu, agora reklama 20 agostu halo kontra golpe festa tinan-tinan maibé na’in mak 20 agostu. Ida-ne’e mak ami mai ko’alia ho Prezidente Repúblika. Ami-nia hakarak ne’e Governu bele rekoñese militár sira 20 agostu hotu-hotu,” nia hateten.
Koordenadór Jerál Militár, Mateus Jesus Valente, hateten dúvida kada tinan Governu komemora loron FALENTIL maibé seidauk haree no hatene FALINTIL ne’e mai hosi ne’ebé sé mak harii no halo, ne’ebé sira-nia parte hamutuk ho kompañia 11 atu hatene loloos FALINTIL ne’e harii foufoun ne’e sívil ka militár.
“Ami dúvida uitoan autór libertadór, fundadór, liberta povu aileba ne’e la’ós sívil momentu ne’ebá militár mak liberta povu aileba. Sé mak husu atu liberta lalais saudozu Nicolau Lobato ho avó Francisco Xavier do Amaral, husu ajuda ba militár. Husu Prezidente atu rekoñese militár juventude 20 agostu 1975 no Prezidente hateten sei estuda,” nia dehan.
Sira-nia parte triste tanba 20 agostu, agora halo ba dala-47 iha tinan 2023 ne’e, ne’ebé sé mak na’in loos no harii to’o agora seidauk hatene, ne’e mak sira husu Prezidente atu hatene liután no sira entrega ona karta sé loos mak na’in ba 20 agostu.
Mezmu nune’e, nia la esplika detallu kona-ba totál membru maibé asosiasaun ne’e iha dadus ka lista sei totál membru organiza sei entrega ba Governu.
Jornalista : Nelson de Sousa
Editór : Cancio Ximenes
