EDTL,E.P estabelese ona sentru venda iha nivel nasional hamutuk 454
DILI, 15 fevereiru 2023 (TATOLI)— Eletrisidade de Timor-Leste, Empreza Públika (EDTL,E.P) daudaun ne’e, estabelese ona sentru venda pulsa eletrisidade ba iha nivel nasionál hamutuk 454.
“Sentru venda ne’ebé ita monta hamutuk 454 ida ne’e ita monta ba munisípiu to’o postu administrativu sira iha territóriu laran,” Komisáriu Ezekutivu Servisu Tékniku no Volgál Konsellu Administrasaun, EDTL,E.P, Latino Jerónimo hateten ba Agência Tatoli, kuarta ne’e.
Nia dehan, sentru venda ne’ebé sira monta haree uluk munisípiu no postu administrativu sira mak suku sira ne’ebé besik,no bele sosa iha postu administrative sira.
“Maibé suku sira ne’ebé dook hosi postu administrativu, ita husu empreza lokál sira bele halo pedidu mai ita fasilita ba estabelese sentru venda refere, tanba ita-nia tarjetu ne’e munisípiu ida bele estabelese sentru venda mínimu 2.000,” Latino dehan.
Nia afirma, antes ne’e EDTL,E.P iha planu atu koopera ho operadór telekomunikasaun sira faan pulsa eletrisidade nian liuhosi online maibé ida ne’e foin planu seidauk iha akordu ofisiál.
“Ita-nia hakarak ne’e, fó uluk oportunidade ba ita-nia empreza lokál sira mak loke sentru venda nune’e bele fasilita komunidade, no lukru oituan ka barak sira mak hetan hafoin ita ba iha online,” nia dehan.
Tanba planu ne’ebé agora sei iha prosesu nia-laran ne’e, ba oin ne’e, aleinde koopera ho operadór telekomunikasaun sira sei ko’alia mós ho Banku Sentrál Timor-Leste (BCTL, sigla portugés) sosa pulsa eletrisidade bele inklui iha P24.
“Ida ne’e ita sosa faan pulsa liuhosi ATM P24, no hosi operadór telekomunikasaun ne’e, atu faan pulsa eletrisidade liuhosi T-Pay no Mosan, maibé ida ne’e sei iha prosesu nia-laran,” Latino haktuir.
Jornalista : Arminda Fonseca
Editora : Armandina Moniz
