Edukasaun Baucau simu reklamasaun hosi profesór voluntáriu 348
BAUCAU, 15 fevereiru 2023 (TATOLI) – Serbisu munisipál edukasuan Baucau simu reklamasaun hosi profesór voluntáriu hamutuk na’in-348 ne’ebé la selesiona iha prosesu rekrutamentu profesór kontratadu hosi Ministéiru Edukasaun, Juventude no Desportu (MEJD).
Diretór Serbisu Munisipál Edukasaun Baucau, Augostu Ornai Ximenes, esplika, profesór sira-ne’ebé naran la selesionadu hodi hetan kontratu, parte edukasuan Baucau orienta no loke oportunidade atu hatama reklamasaun bazea ba orientasaun hosi MEJD nasionál.
“Ami iha orbrigasaun tuir orientasaun atu oinsá fasilita ba sira-ne’ebé seidauk liu selesaun,” Diretór Serbisu Munisipál Edukasaun Baucau hateten iha Vila Nova, kuarta ne’e.
Durasaun ba reklamante sira hahú loron-15 to’o 28 fevereiru ne’ebé mak aprezenta reklamasaun eskrita no hetan vistu hosi diretór eskola no edukasaun munisipál sei prienxe formatu reklamasaun nível munisipál hodi hato’o MEJD atu justifika tuir razaun.
Tuir rekizitu no vaga mak determina prosesu rekrutamentu ba profesór kontratadu atu selesionadu hodi hetan kontratu hosi MEJD hanesan tenke sidadaun Timor-Leste, CV, idade mínimu 17 to’o 50, diploma edukasaun literaria ikus, karta deklarasaun hosi eskola, profesór voluntáriu iha eskola katóliku mínimu hala’o kna’ar hosi tinan-2023 to’o 2013, profesór voluntáriu iha eskola privadu mínimu halao kna’ar hosi tinan-2014 to’o 2017, eskola públiku voluntáriu hosi 2007 -2017 no hosi 2018-2021 tuir nesesissade.
Bazea ba rekizitu tenke liuhosi selesaun dokumentu, selesaun abilitasaun literaria tuir nível ensinu no dokumentu hotu tenke tuir rekizitu ne’ebé estabelese hosi komisaun selesaun dokumentu.
“Ida-ne’e mak rezulta balun tenke la selesionadu iha prosesu rekrutamentu,” Augostu Ximenes akresenta.
Augostu Ximenes husu ba ministériu edukasaun atu konsidera dedikasaun ne’ebé hala’o ona hosi profesór voluntáriu sira mesmu idade 50 ona maibé dedikasaun durante tinan-sanulu tenke valoriza tanba sei iha tinan-sanulu atu dedika aan nu’udar profesór.
Profesór voluntáriu Ensinu Sekundáriu Filial Dom Carlos Filipe Ximenes Afaca, postu Quelicai, Eduardo Ximenes sente triste no la sastifaz ho rezultadu ne’ebé fó-sai hosi MEJD liuhosi selesaun dokumentu ne’ebé halao hosi komisaun rekrutamentu hosi nasionál.
Reklamante Eduardo Ximenes aprezenta razaun momentu submete dokumentu idade prense tuir kritéria idade idade 50 maibé iha pesóal balun idade liu 51 konsege pasa no hetan kontratu hosi ministériu.
“Ha’u iha evidénsia, ita konsidera falla ne’ebé parte ministériu halo iha prosesu selesaun dokumentu,” Eduardo Ximenes argumenta.
Totál profesór iha ESJ filial Dom Carlos Belo hamutuk nain-15 ne’ebé durante tinan-sanalu ona halao kna’ar volontáriamente nu’udar profesór maibé iha prosesu rekrutamentu profesór na’in-13 pasa no hetan kontratadu, enkuantu na’in-rua seluk tenke kontinua voluntáriu tanba konsidera la prienxe kritéria hanesan idade no diploma edukasaun literaria ikus.
“Ami husu ministru atu solusiona ami-nia problema,” Eduardo Ximenes akresenta.
Antes ne’e, iha fulan-agostu 2022, komisaun prosesa selesaun dokumentu ba profesór voluntáriu ne’ebé hala’o kna’ar iha Baucau na’in-625 no rezultadu fó-sai profesór na’in-227 mak hetan kontratu, enkuantu 348 mak tenke halo reklamasaun.
Jornalista : Natalino Belo
Editór : Evaristo Soares Martins
