Ekipa IHEAL Malazia sei halo instalasaun ba fasilidade kardiaku iha Lahane
DILI,15 fevereiru 2023 (TATOLI) – Vise-Minsitru Saúde Bonifacio Maucoli dos Reis, informa tempu badak ekipa IHEAL Malazia sei halo instalasaun ba fasilidade iha sentru kardiaku Ospitál Antonio Carvalho Lahane.
“Ekipa tékniku IHEAL Malazia daudaun ne’e iha ona Timor-Leste hodi halo enkontru ikus ho ita atu asina akordu dala ida tan ba instalasaun ekipamentu iha sentru kardiaku Lahane no mós oinsa halo mobilizasaun ba rekursu umanu”, Bonifacio Maucoli dos Reis dehan ba TATOLI, ohin.
Nia dehan, antes ne’e MS ho ekipa Malazia asina akordu amarela ona, maibé agora sei asina akordu kona-ba oinsá atu halo instalasaun ba ekipamentu sira.
“Agora ne’e, tama ona ba substansiál, oinsá atu halo prudénsia ba reabilitasaun ekipamentu no instalasaun sira no mós oinsá ba haree rekusru umanu”, nia informa.
Nia esplika, Empreza AND konklui ona verifikasaun ba reabilitasaun iha semana kotuk no ohin halo ona prosesu tanba ekipa tékniku sira husi IHEAL iha ne’e ona atu haree ba infraestrutura interna nian.
“Tuir akordu no promesa ne’ebé mak ami iha katak fulan abril, klínika kardiaku bele hahú funsiona maibé kona-ba operasaun dahuluk mak sei hahú iha fulan juñu, ba sira ne’ebé mak ho problema kardiaku”, nia esklarese.
Iha operasaun dahuluk ne’e, ekipa tékniku sira husi iHeal sei servisu hamutuk ho Timor-Leste hodi apoiu ba klínika ne’e rasik.
Médiku sira IHEAL mai servisu hamutuk ho ita nia espesialista hodi apoiu servisu iha klínika ne’e rasik ba operasaun nian tanba sira akompaña ita durante tinan lima to’o 10 iha ne’e”, nia relata.
Tanba ne’e, tuir planu, MS haruka médiku sira ba foti tan sub-espesialista iha rai-liur bainhira hatene ona mak bele halo operasaun mesak ba fuan.
Jornalista : Felicidade Ximenes
Editór : Zezito Silva
