DILI, 15 fevereiru 2023 (TATOLI) – Governu liuhosi reuniaun Konsellu Ministru aprova alterasaun Dekretu-Lei n.u 31/2011, loron 27 fulan-jullu, ne’ebé kria Timor Gap – Timor Gás & Petróleu, E.P., nomós ba nia estatutu sira. Projetu dekretu-lei ne’e aprezenta husi Ministru Petróleu no Minerál, Víctor da Conceição Soares.
“Alterasaun ida-ne’e ninia objetivu atu enkuadra estatutu sira Timor Gap ho kontestu atuál, no adapta objetivu no prinsípiu estruturante sira Timor Gap nian enkuantu empreza públika, vizaun estratéjika ida aselerasaun kreximentu empreza ba prazu médiu-naruk, atu atrai oportunidade investimentu iha setór sira petróleu, gás naturál no kualkér idrokarbonetu seluk no ninia derivadu sira iha Timor-Leste”, Ministru Prezidénsia Konsellu Ministru hatete iha Palásiu Governu.
Fidélis Magalhães hatutan entre alterasaun sira ne’ebé define husi diploma ida-ne’e, destaka subordinasaun empreza ba podér sira tutela no superintendénsia ba ministru idaidak no aliñamentu husi sira-nia atividade ho orientasaun no objetivu sira Governu nian.
Nune’e mós posibilidade partisipasaun Timor Gap iha kualkér operasaun petrolífera, liuliu sira ne’ebé realiza iha ámbitu Tratadu ne’ebé estabelese Fronteira Marítima iha Tasi Timór no rejime espesiál Greater Sunrise.
“Diploma ne’e sei permite katak Timor Gap atu esplora área intervensaun no objetivu estratéjiku foun sira, ne’ebé aliña ho espetativa no orientasaun Governu nian sira ba dezenvolvimentu setór petróleu, gás naturál no idrokarbonetu seluk no ninia derivadu sira”, nia konklui.
Jornalista: Antónia Gusmão
Editora: Maria Auxiliadora
