DILI, 15 fevereiru 2023 (TATOLI)– Governu aprova alterasaun kalendáriu operasaun ba resenseamentu eleitorál iha rai-li’ur, ne’ebé aprezenta husi Ministru Administrasaun Estatál, Miguel de Carvalho.
“Formasaun ba membru sira Komisaun Resenseamentu Eleitorál sei hala’o iha loron 27 no 28 fulan-fevereiru tinan 2023”, Ministru Prezidénsia Konsellu Ministru, Fidélis Magalhães, hateten iha Palásiu Governu.
Kona-bá inskrisaun sira ba resenseamentu eleitorál sei hala’o entre 01 to’o 31 marsu 2023. Enkuantu elaborasaun, extrasaun no remesa ba lista eleitór sira nian, liuhusi via eletrónika, husi misaun diplomátika sira no postu konsulár ida-idak sei hala’o iha loron 01 to’o 02 abríl 2023.
“Períodu espozisaun no reklamasaun ba lista eleitór sira ne’ebé hela iha rai-li’ur ne’e define ona ba períodu husi 03 no 07 abril 2023 no sinkronizasaun sistema resenseamentu eleitorál nian, sei hala’o entre 08 no 20 abril 2023. Ikusliu, númeru sira ne’ebé inskritu iha resenseamentu eleitorál tenke publika to’o 21 abril”, nia informa.
Iha reuniaun Konsellu Ministru foin lalais deside katak inskrisaun ba resenseamentu eleitorál hala’o entre 24 fevereiru no 24 marsu. No períodu espozisaun no reklamasaun ba lista eleitór sira ne’ebé hela iha rai-li’ur ne’e define ba períodu husi 27 to’o 31 marsu no sinkronizasaun sistema resenseamentu eleitorál sei hala’o entre 01 no 11 abríl.
Notísia relevante : https://tatoli.tl/2023/02/01/governu-aprova-kalendariu-operasaun-resensiamentu-eleitoral-iha-rai-liur/
Jornalista: Antónia Gusmão
Editora: Maria Auxiliadora
