DILI, 15 fevereiru 2023 (TATOLI) – Governu tau ona iha planu hodi muda sidade administrativa Governu nian iha kapitál ba fali iha área postu administrativu Metinaru, munisípiu Dili.
“Konsellu Ministru rona no apresia aprezentasaun hosi Ministru Planu no Ordenamentu, José dos Reis, kona-ba opsaun sira ba lokalizasaun sidade administrativa foun. Ne’ebé, futuru mai instalasaun ba sidade administrativa Governu iha vizaun ida katak sei bele muda fali ba iha parte Leste hanesan Metinaru”, Ministru Prezidénsia Konsellu Ministru, Fidélis Magalhães, hateten iha Palásiu Governu.
Maibé, asuntu ne’e iha hela prosesu identifikasaun fatin, halo levantamentu hodi hili lokál ida ne’ebé apropriadu.
“Iha aprezentasaun ne’e ko’alia mós opsaun sira lejizlativa nian ne’ebé mak tenke halo para konkretiza objetivu ida ne’e”, dehan.
Razaun ida hodi Governu muda sidade Dili tanba kapitál kloot ba daudaun ho aumentu populasaun ne’ebé mak maka’as, nune’e fó biban hodi hadi’ak fali sidade.
Tuir relatóriu preliminár Sensu Populasaun no Uma-Kain 2022, rejista abitante iha Dili hamutuk 324.269.
Jornalista: Antónia Gusmão
Editora: Maria Auxiliadora
