Kandidatu brigadista 515 tuir teste eskrita iha Baucau
BAUCAU, 15 fevereiru 2023 (TATOLI) – Kandidatu brigadista hamutuk 515 tuir teste hosi Sekretariadu Tékniku Administrasaun Eleitorál (STAE) munisípiu Baucau hodi hasoru eleisaun parlamentár tinan 2023.
Diretór STAE Baucau, Natividade Freitas, esplika, kandidatu hirak-ne’e maihosi postu administrativu neen ne’ebé tuir teste eskrita kona-bá lala’ok eleisaun nian no fahe ba turnu rua, dadeer no lokraik tanba kondisaun fatin ne’ebé la sufisiente.
“Sentru votasaun ida mínimu sei rekruta ema na’in-haat nune’e bele kontinua ba teste orál,” Diretór STAE Baucau hateten iha Sentru Konvensaun Baucau (CCB, sigla portugés), kuarta ne’e.
Kandidatu hosi postu Baguia, Quelicai, Venilale no Vemasse mak tuir teste eskrita ba turnu dadeer no sei kontinua kedas ba postu Baucau Vila no Laga iha turnu lokraik.
Prosesu teste envolve ekipa juri na’in-tolu komposta hoai STAE nasionál na’in-ida no munisípiu na’in-rua.
Hosi totál kandidatu sira-ne’ebé tuir teste bainhira pasa sei kontinua ba teste orál no tuir planu sei kontrata brigadista hamutuk 150 hodi destaka ba kada postu no suku tuir númeru sentru votasaun iha eleisaun parlamentár.
Prosesu rekrutamentu refere nu’udar parte preparasaun hosi STAE Baucau atu hasoru elisaun parlamentár ne’ebé Prezidente Repúblika dekreta ona sei realiza iha loron-21 fulan-maiu tinan-ne’e.
“Sempre prontu tanba eleisaun la’ós foun ba STAE entaun ita garante sei sussesu,” Natividade Freitas argumenta.
Jornalista : Natalino Belo
Editór : Evaristo Soares Martins
