Profesór voluntáriu 227 iha Baucau hetan kontratu hosi MEJD

BAUCAU, 15 fevereiru 2023 (TATOLI) – Profesór voluntáriu hamutuk na’in-227 iha munisípiu Baucau hetan kontratu hosi Ministériu Edukasaun, Juventude no Desportu (MEJD) iha tinan-ne’e.

Diretór Serbisu Munisipál Edukasaun Baucau, Augostu Ornai Ximenes, orienta profesór ne’ebé naran liu iha selesaun no hetan kontratu hosi ministériu atu kumpre despaxu ministériu hodi hahú asina kontratu tuir data determinante.

“Baucau hetan profesór 227 voluntáriu ne’ebé mak kualifikadu no sei asina kontratu hahú ohin to’o remata,” Diretór Serbisu Munisipál Edukasaun Baucau hateten iha Vila Nova, kuarta ne’e.

Prosesu rekrutamentu refere hala’o bazea ba diploma ministeriál númeru 4, Gabinete MEJD/II/2023 ne’ebé iha Baucau bazea ba levantamentu no verifikasaun dadus hamutuk totál na’in-625 ne’ebé submete ba prosesu refere hosi nível edukasuan pre-eskolár, ensinu báziku no sekundáriu inklui tékniku profisionál.

Prosesu rekrutamentu iha Baucau hahú iha fulan-agostu 2022 bazeia ba despaxu hosi ministru nune’e Edukasaun Baucau konsege halibur hotu profesór kontratadu sira iha nível eskola hotu hodi tuir prosesu selesaun ba rekrutamentu refere iha tinan-2022.

“Seidauk sufisiente tanba profesór efetivu voluntáriu hamutuk 600-resin mak sei hala’o kna’ar iha eskola sira,” Augosto Ximenes akresenta.

Augostu Ximenes argumenta, profesór iha munisípiu Baucau seidauk sufisiente tanba profesór voluntáriu mak durante ne’e taka menus profesór iha ensinu aprenizajen hotu iha Baucau.

Tuir dadus, totál eskola iha munisípiu Baucau hosi pre-eskolar to’o ensinu sekundáriu publiku no vokasionál hamutuk 243 ho totál profesór 2.200 inklui ona profesór voluntáriu na’in-625 resin ne’ebé tuir vaga iha tinan-2022.

Jornalista    : Natalino Belo

Editór           : Evaristo Soares Martins