Agrikultór Covalima hahú fila-rai ba époka dahuluk halai natar
COVALIMA, 16 fevreiru 2023 (TATOLI)–Diretór Servisu Munisipál Agrikultura Covalima, Domingos Gusmão, hateten agrikultór iha Covalima prepara hahú fila-rai ba époka dahuluk halai natar iha Munisípiu Covalima.
“Agora daudaun sira halo ona atividade preparasaun ba époka dahuluk hatama bee no komesa fila rai ona. Ita atu hatene munisípiu Covalima poténsialidade ba natar ne’ebé depende ba udan been,” Domingos Gusmão hateten ba Agência Tatoli iha Tabakolot, kinta ne’e.
Nia dehan, iha munisípiu Covalima ne’e postu administrativu Zumalai, Suai no Fatumea mak rai poténsial ba natar ne’ebé depende ba udan-been iha área kultivasaun no kolleta.
Tanba ne’e, oras ne’e daudaun agrikultór-sira lavra hela rai iha postu administrativu tolu (3) sira kuaze okupadu-ona ho atividade fila rai ba époka dahuluk.
Ho nune’e, Dirasaun Jerál destaka ona eskavadór hodi halo normalizasaun kanál irrigasaun prinsipál iha Oebaba no kanál permanente iha Beilaku hahú kee sai sedimentasaun kauza hosi udan no mota boot.
Razaun Dirasaun jerál destaka ona eskavadór hodi kee sai sedimentasaun, nune’e bee bele halai tuir kanál nune’e agrikultór sira asesu bee preparasaun kuda hare ba époka dahuluk tinan 2023.
“Oras ne’e daudaun, bainhira ita-tun ba kampu agrikultór-sira kuaze halo preparasaun atu kuda hare, ida-ne’e liu-liu sira iha atividade fila rai nian,” nia hateten.
Dadus produsaun hare kulit iha tinan 2022 hamutuk tonelada 9885.58 mai hosi postu administrativu Suai, Zumalai no Fatumea ho totál área potensiál 12.167, área kultivasaun 2069,35, produtividade 3.79.
Jornalista : Celestina Teles
Editór : Cancio Ximenes
