Autoridade diskute asuntu haat ho komunidade Lifau kona-bá projetu estrada Nítibe
OÉ-CUSSE 16 fevereiru 2023 (TATOLI) – Autoridade Rejiaun Administrativa Espsiál Oé-Cusse Ambeno (RAEOA), lideradu Arsénio Paixão Bano, kinta ne’e realiza diálogu aberta hodi diskute kestaun haat ho komunidade afetadu suku Lifau kona-bá alargamentu estrada nasionál pakote I hosi Ponte Noefefan, sub-rejiaun Pante Makasar liga Oénunu, suku Suni-Ufe, sub-rejiaun Nítibe.
Diálogu aberta ne’e fasilita hosi jurista advokasia no rede ba rai ne’ebé hala’o iha bairru Aes-Ero, aldeia Tula-Ika, suku Lifau, sub-rejiaun Pante Makasar.
Hafoin remata diálogu aberta ne’e, PrezidenteAutoridade RAEOA, Arsénio Paixão Bano, informa, sorumutu entre parte rua oportunidade di’ak atu rona direita komunidade sira-nia preokupasaun hodi fó mós informasaun pozitivu.
Tuir nia, tazaun autoridade hasoru direita ho komunidade tanba daudaun ne’e konstrusaun estrada nasionál ne’e kompañia hahú aterru ona, komunidade konstribui oferese rai no plantasaun iha prosesu levantamentu dadús.
“Tan ne’e ohin ita mai ko’alia ho sira, iha kestaun haat ita ko’alia ho komunidade rai na’in-sira hotu presiza servisu hamutuk, primeiru levantamentu ba rai, parsela hotu-hotu tenke hamutuk atu hatene rai metru hira mak afeta kada parsela, segundu atu hatene mós ba uma kuandu hetan afeta, terseiru maka plantasaun ai-oan sira produtivu, ikus bee-posu ne’ebé afeta, no ita simu sujestaun foun atu haree mós batar iha to’os no hare iha natar,” Arsénio Paixão Bano, informa ba jornalista sira iha suku Lifau Oé-Cusse.
Aliende ne’e mós, iha sujestaun seluk, komunidade afetadu husu atu iha koordenasaun atu hetan informasaun, liuliu ba dadús kona-bá, afeta, presiza iha dokumentu ida ba komunidade sira sai hanesan evidénsia ba sira, ba futuru atu halo pagamentu sira bele aprezenta dokumentu ne’e.
“Entaun solusaun ita korkorda ona iha segunda semana oin, ekipa sira sei tún direita iha terrenu hamutuk ho komunidade atu haree direita, atu halo levantamentu dala ida, konfirma levantamentu ne’ebé maka halo ona, depois ita entrega evidénsia ida ba sira atu kaer,” nia katak.
Iha fatin hanesan, xefe suku Lifau, Lazaro Kenat, sosializaun ohin ikus ona, tanba dala tolu ona realiza iha sede suku, ohin mai direita iha komunidade nia leet, atu rona direita iha deskusaun ohin loron.
“Tán ne’e ami agradese ba Autoridade RAEOA, tanba iha sosializaun dahuluk balu la pastisipa, maibé ohin ita haree maioria partisipa másimu, atu rona no hato’o sira-nia preokupasaun direita, atu iha futuru labele hamosu tán preokupasaun ba autoridade suku, ohin oportunidade bele aprezenta direita ba Prezidente atu rona direita,” nia orgullu.
Iha biban ne’e, komunidade afetadu Domingos Abi, sujere ba Autoridade RAEOA atu distribui dokumentu komprovativu ba kada komunidade afetadu bainhira sukat ona rai no rejista ona plantasaun ne’ebé hetan afeta, nune’e bele sai hanesan evidénsia ba futuru pagamentu.
“Estrada ne’e kompañia aterru ona, ha’u só husu de’it dadus kona-bá rai no ai-oan inklui ne’ebé hetan afeta, ami husu tanba ami uma-kain idak-idak tenke hatene dadus, hanesan rai afeta karik, metru hira no ai-oan hira, ne’e atu ami kaer no autoridade suku mós hetan, hanesan edivénsia ida, bainhira iha futuru halo pagamentu karik ami hatene ona kona-bá sasán ne’ebé hetan afeta,” nia sujere.
Jose Anuno, nu’udar abitante afetadu hosi natar Kakatua-Ana, agradese ba Autoridade RAEOA hamutuk tékniku sira, bele hakbesik ba povu hodi esklarese kona-bá prosesu konstrusaun estrada nasionál ne’e.
“Ohin ami agradese tanba ami rona direita orientasaun hosi Prezidente Autoridade RAEOA, sorumutu ida-ne’e la’ós istória malu maibé buka solusaun, no koordenasaun oinsá servisu hamutuk haree ita-nia dezenvolvimentu iha Oe-Cusse tenke la’o ba oin,” nia orgullu.
Entretantu, projetu ne’e Autoridade RAEOA, hahú halo lansamentu iha 19 agostu 2022 no distánsia konstrusaun ba estrada nasionál ne’e hamutuk kilómetru 16, hahú hosi ponte Noefafan, suku Lifau, envolve suku Taiboko, sub-rejiaun Pante Makasar to’o Oénunu, suku Suni-Ufe, sub-rejiaun Nítibe.
Nune’e mós projetu realibitasaun estrada nasionál pakote I hahú hosi ponte Noefefan, suku Lifau, sub-rejiaun Pante Makasar to’o Oénunu, suku Suni-Ufe, sub-rejiaun Nítibe ho distánsia kilometru 18, ezekuta hosi empreza internasionál PT. Waskita Karya, Tbk, ho valór kontratu millaun $23, ne’ebé autoridade RAEOA prevee hosi Orsamentu Jerál Estadu (OJE) 2022 ho durasaun servisu durante fulan 18.
Jornalista: Abílio Elo Nini
Editór: Evaristo Soares Martins
