IJT Covalima identifika kompaña 17 viola lei traballu
COVALIMA, 16 fevereiru 2023 (TATOLI)–Inspetór Traballu Rejionál Covalima, Gabriel Gusmão, liohosi vizita inspesaun 216 identifika kompaña 17 ne’ebé eziste iha Covalima viola lei traballu.
“Inspesaun Jerál Traballu (IJT) iha tinan 2022 vizita estabelesimentu 54 ne’e, ami halo vizita inspesaun ba 216, ami identifika kazu 21 ne’ebé kompañia 17 viola lei traballu iha Covalima,” Inspetór Traballu Rejionál Covalima, Gabriel Gusmão, relata ba Agência Tatoli, iha Bairru Costa, Covalima, kinta ne’e.
Tipu kazu 21 sira mak hanesan tipu kazu ekipamentu protesaun haat (4), overtime ida (1), autorizasaun traballu hitu (7), subsídiu anuál rua (2) no kontratu trabalu ne’e iha lima (5).
Iha vizita estabelesementu 54 ne’e, identifika kompaña viola lei traballu hamutuk 17 no hosi ne’e kompañia lokál ualu (8) no kompaña estranjeiru sia (9) ne’ebé IJT foti ona medida hodi aplika sansaun ka multa ba sira.
“Ami rejista kazu 21, ami foti ona medida multa ba sira-ne’ebé halo pagamentu direta ba iha Banku Nasionál Ultramarinu sukursál Suai. Kompañia lokál ne’e ami rejista iha ami-nia lista, ami abranze detraballu kompañia balun ema fó servisu maibé balun fó servisu naran iha, ema servisu laiha entaun atividade la la’o. Ami la foti dadus hatama iha vizita inspesaun,” nia hateten.
Kompañia viola lei traballu hamutuk 17 ne’e IJT aplika multa ba sira ho totál orsamentu ne’ebé selu iha BNU hamutuk $6000-resin.
Jornalista : Celestina Teles
Editór : Cancio Ximenes
