Kada loron Sentru Nasionál Matan halo operasaun ba kazu katarata 20
DILI,16 fevereiru 2023 (TATOLI) – Xefe Departamentu Matan iha Hospitál Nasionál Guido Valadares (HNGV) Julia Rosalina Cesar Magno, informa kada loron, Sentru Nasionál Matan halo operasaun ba kazu katarata kuaze 20.
“Pasiente sira mai ho problema matan katarata, loron ida ita bele opera 10 to’o 20”, Julia Rosalina Cesar Magno, dehan iha nia kna’ar fatin Sentru Matan Nasionál, ohin.
Nia dehan, kazu matan ne’e ba labarik no ema bo’ot ho kondisaun matan ne’ebé mak diferente. Tanba kada loron bele atende pasiente matan 75 to’o 150 ne’ebé mak problema ho matan.
“Pasiente sira ne’ebé atu halo operasaun matan iha kama rua ne’ebé kada loron iha médiku na’in rua mak sei halo operasaun ba pasiente sira ho problema matan katarata”, nia hateten.
Dadus 2022, pasiente ne’ebé ho problema matan hamutuk 10.000-resin mak Sentru Matan Nasionál atende ona, husi númeru ne’e kazu katarata mak barak. Husi dadus ne’e maioria pasiente ho idade 45 ba leten, mak barak liu mai ho problema matan katarata.
Sentru Matan Nasionál daudaun ne’e hala’o hela programa autrix ba operasaun iha munisípiu sira, tanba haree ba númeru iha ne’e kada loron sempre aumenta, entaun ho programa ida autrix bele redús pasiente sira husi munisípiu mai Dili.
Kazu katarata ne’e mosu ba katuas no ferik sira tanba idade ona maibé atu prevene moras matan, sujere ba populasaun sira ne’ebé servisu iha loron manas laran tenke uza oklu metan no sapaeu hodi proteje matan.
Kona-ba ekipamentu Sentru Matan Nasionál sufisiente hodi halo atendimentu ba ema ho probelma matan ne’ebé mai hodi halo tratamentu iha HNGV.
Jornalista:Felicidade Ximenes
Editór : Zezito Silva
