Konsellu veteranu apoia orsamentu ba estudante 59 iha Baucau
BAUCAU, 16 fevereiru 2023 (TATOLI) – Konsellu Munisipál Kombatente Libertasaun Nasionál (CMCLN, sigla portugés) Baucau apoia orsamentu ba estudante na’in-59 hosi aman veteranu iha tinan-ne’e.
Sekretáriu Jerál CMCLN, Manuel ‘Alari’ da Costa Soares, esplika, orsamentu refere mai hosi Servisu Apoiu Soseidade Sivíl no Auditória Sosiál-Primeiru Ministru (SASCAS-PM, sigla portugés) hafoin Konsellu Kombatente Libertasaun Nasionál (CCLN) hato’o proposta ba governu relasiona no oan hosi veteranu ne’ebé laiha kbiit atu kontinua estudu iha nível ensinu hotu.
“Osan ne’e maske oituan, maibé bele ajuda ona sira, entaun tinan-ne’e ita hahú ho $400 ba kada estudante,” Sekretáriu Jerál CMCLN hateten iha Vila Antiga, kinta ne’e.
Konsellu veteranu Baucau liuhosi ekipa rua hanesan hanesan sekretáriu zona iha kada postu admistrativu inklui ekipa Naroman Matebian halo identifikasaun hanesan verifika dokumentu no faktu realidade moris ne’ebé estudante sira hasoru iha baze.
Durasaun ba prosesu verifikasaun durante fulan-3 iha suku 59 ho kategoria veteranu 0-3 no 4-7 ne’ebé sei estudu iha iha Ensinu Báziku Primeiru-Segundu Siklu, Ensinu Báziku Treseiru Siklu, Ensinu Sekundária no Ensinu Superiór.
“Maske ema hotu presiza, maibé balun laiha liu kedas, entaun ami identifika ida-ne’ebé mak presiza liu mak ita ajuda,” Alari akresenta.
Governu liuhosi SASCAS-Primeiru Ministru aloka orsamentu hamutuk $23.000 ba Baucau ne’ebé mak orsamentu refere benefísia estudante hamutuk na’in-59 iha munisípu Baucau.
CMCLN Baucau hato’o mesajen ba estudante 59 ne’ebé sai benefisiáriu ba apoia refere atu kontinua estudu nune’e bele benefísia ba futuru.
Jornalista : Natalino Belo
Editór : Evaristo Soares Martins
