Meza PN reajenda eleisaun komisáriu CAC iha semana oin
DILI, 16 fevereiru 2023 (TATOLI)-Meza Parlamentu Nasionál (PN), re-ajenda eleisaun ba komisáriu Komisaun Anti-Korrupsaun (CAC, siglá portugés) foun iha semana oin loron 20 fulan-fevereiru.
Notísia Relevante: PN adia eleisaun ba Komisáriu CAC tanba la prenxe korum
“Meza nia kompeténsia atu bele asegura normál funsionamentu instituisaun, asuntu ida-ne’ebé mak tama iha meza presiza atu hetan atensaun hodi bele ba ajendamentu meza sempre hala’o,” Sekretária Meza PN, Lídia Norberta Martins, hateten ba jornalista sira iha PN, kinta ne’e.
Iha kinta (16/02) ne’e, meza PN iha ajenda reuniaun lidér bankada atu hodi hetan apresiasaun hosi reuniaun lidér bankada hanesan órgaun konsultivu, kona-ba diskute eleisaun ba komisáriu CAC maibé la konsege realiza.
Nia hateten, labele realiza eleisaun ba komisáriu CAC tanba la prenxe korum, aleinde deputadu sira mós preokupa iha komisaun ho ajenda audiénsia ne’ebé atende hela.
“Iha bankada hitu tuir ajenda reuniaun líder bankada hahú iha tuku 09h00 dadeer, maibé la prenxe korum hanesan hosi bankada FRETILIN ba tiha ne’eba fila-fali mai, depois PLP, KHUNTO mós hotu, no bankada CNRT tékniku sira ba haree fila, entaun korum la konsege prenxe hodi bele halo reuniaun entaun Prezidente PN hein to’o tuku 11h00,” nia dehan.
Maske nune’e, meza PN reuniaun plenária deside iha semana oin sei reajenda eleisaun komisáriu CAC.
Entertantu, tuir ajenda reuniaun líder bankada loloos atu diskute kinta ne’e, ne’ebé jornalista Agência Tatoli asesu mak hanesan eleisaun komisáriu CAC, eleisaun membru konsellu konsultivu fundu petrolíferu, informasaun kona-ba kompozisaun Konsellu Imprensa no ajendamentu tomda pose ba Prezidente, ajendamentu reuniaun plenária ba iha loron 20-21 fevereiru mai hanesan asentimentu dezlokasaun Prezidente Repúblika ba estranjeiru hosi 04-14 marsu 2023, ho asuntu sira seluk.
Jornalista : Nelson de Sousa
Editór : Cancio Ximenes
