DILI, 16 fevereiru 2023 (TATOLI) – Ministériu Planu no Ordenamentu (MPO) sei realiza semináriu hodi diskute rezultadu konsulta públika ba reajustamentu Planu Estratéjiku Dezenvolvimentu (PED 2011-2023) ba entidade hotu.
“Ami sei iha reajustamentu no sei aprezenta rezultadu no rekomendasaun sira ba komisaun interministeriál iha fin fevereiru. Prosesu ba dokumentu sira hotu tiha ona, daudaun halo tan konsulta balun ne’ebé ekipa téknika halo. Sei halo mós workshop ida hodi diskute rekomendasaun sira durante hetan iha konsulta públika”, José Reis hateten ba Agência Tatoli, iha Palásiu Governu.
Nia hatutan durante konsulta ho partidu polítiku no tékniku sira fó hanoin oinsá maka atu halo enkuadramentu ba rezultadu ne’e tuir rekomendasaun sira ne’ebé mak halo.
“Tanba ne’e la’ós programa Governu ida agora ne’e nian de’it, ne’e enkuadramentu rezultadu iha nivel kurtu, médiu no longu prazu”, dehan.
Tuir Vise-Primeiru-Ministru Asuntu Infraestrutura, aban-bainrua Ezekutivu ida mai, nia hatama ninia programahodi enkuadra ba iha objetivu sira ne’ebé kurtu prazu katak saida mak tama iha área ka sub-setór ida ne’e.
“Ne’ebé, konsulta mai hosi tékniku sira hotu atubele hadi’ak liután rezultadu tuir pilár sira, setór no sub-setór”, nia salienta.
To’o agora ekipa téknika mós seida’uk halo konsulta ho Xanana Gusmão nu’udar promotór ba PED ne’e rasik, maski haruka ona karta ofisiál.
“Uluk nia mak hahú ekipa ida ne’e, hanesan ha’u hateten ona katak ha’u haruka karta ida ba Xanana Gusmão, maibé foin lalais ha’u liuhosi fali Prezidente Repúblika para bele tenta ko’alia ho nia, más to’o agora seidauk hetan rezultadu. Instrumentu planu urbanu ne’e mós ha’u haruka hotu ba nia para atu fó ideia ruma”, nia esplika.
Antes ne’e ministru esplika katak reajustamentu PED 2011-2030 ne’e tanba implementasaun tinan-10 ona, husi 2011 to’o 2022, no agora atu tama ba 2023. Iha dokumentu PED ne’e rasik mós define prazu tolu, dahuluk mak kurtu prazu ne’ebé tinan lori tinan lima (2011-2015), daruak (2015-2020), agora tama ona ba datoluk (2020-2030).
Tanba ne’e, prioridade tebes VIII Governu foti planu ordenamentu estratéjiku atu halo reajustamentu tanba tinan sanulu implementasaun PED, maibé povu sei halerik ba infraestrutura bázika hanesan problema bee-moos, estrada no seluk tan.
Jornalista: Antónia Gusmão
Editora: Maria Auxiliadora
