STAE Covalima fó teste eskrita ba kandidatu pontu fokál-brigada 347
COVALIMA, 16 fevereiru 2023 (TATOLI)–Sekretáriadu Tékniku Administrasaun Eleitorál (STAE) Covalima, kinta ne’e, akompañadu hosi prezidente juri STAE nasionál, hahú fó ona teste eskrita ba kandidatu pontu fokál no brigada sira na’in-347 hodi prepara ba eleisaun parlamentár.
“Ohin ita hahú fó ona teste eskrita ba kandidatu pontu vokál no brigada sirahamutuk 347 tuir teste eskrita no hosi númeru ne’e kandidatu brigada na’in-300 no kandidatu pontu fokál na’in-47,” Diretór STAE Covalima, Francisco Gusmão, hateten ba Agência Tatoli, iha salaun STAE, Kampung Baru, kinta ne’e.
Teste eskrita ne’e hala’o durante loron ida-ne’ebé fahe ba faze rua mak hanesan faze dahuluk kandidatu na’in-150 no faze daruak na’in-150, nune’e teste ne’e bele finaliza kedas no hafoin finaliza mak sei halo selesaun matéria no sei fó sai rezultadu teste hodi kontinua ba iha prosesu teste orál.
Prezidente juri STAE Nasionál, Adolfo da Silva, husu kandidatu brigada no pontu fokál sira tenke tuir teste eskrita ho dixiplina no bandu hasai foto matéria eskrita.
“Prosesu tuir teste bainhira prenxe matéria labele hasai foto iha prosesu teste ne’e no labele atu husu malu. Buat prosesu rekrutamentu ita-fiar ita nia-an tanba teste eskrita hanesan teste de’it ita-bo’ot sira-nia hanoin, maibé importante tenke ho dixiplina,” nia hateten.
Dadus sidadaun ne’ebé submete sira-nia dokumentu ba STAE hamutuk na’in-347 no hosi númeru ne’e na’in-300 aplika ba vaga kandidatu brigada no ida-ne’ebé aplika ba vaga pontu fokál ne’e na’in-47.
Bazea vaga ne’ebé STAE fó sai prezija na’in-107 no hosi númeru ne’e pontu fokál na’in-hitu (7) no brigada na’in-100 hodi prepara ba eleisaun parlamentar.
Entertantu, Prezidente Repúblika José Manuel Ramos Horta, dekreta loron iha eleisaun parlamentár ne’e sei akontese iha 21 maiu.
Atu tuir eleisaun parlamentár 2023 ne’e, CNE anunsiu ona partidu polítiku hamutuk 24 mak sei konkoore ioha eleisaun parlamentár no STAE mós deklara katak peridou kampaña eleitorál ba eleisaun parlamentár ne’es ei hahú iha 18 abríl 2023.
Jornalista : Celestina Teles
Editór : Cancio Ximenes
