iklan

EKONOMIA, HEADLINE

Traballadór timor oan kontente hetan oportunidade ba servisu iha Korea Súl

Traballadór timor oan kontente hetan oportunidade ba servisu iha Korea Súl

Traballadór timoroan tuir enkontru hodi rona esplikasaun no mensajen sira hosi SEFOPE molok bá serbisu iha Koreia Súl, iha Timor Lodge, Comoro, kinta (16/02). Imajen Tatoli/Francisco Sony

DILI, 16 fevereiru 2023 (TATOLI)—Traballadór timor oan kontente bele hetan oportunidade hodi  servisu iha Korea Súl.

Espresaun kontenti ne’e hatudu hosi traballadór Gabriel Correia Sarmento, hosi munisípiu Liquiça no Armandino do Rosário (Bobonaro), wainhira  sira hamutuk ho familia no Governu liu hosi Sekretáriu Estadu Formasaun Profesionál no Empregu (SEFOPE), asina deklarasaun antes aranka ba Korea Súl. Serimonia asina deklarasaun ne’e halao iha  Timor-Lodge Comoro, Dili, kinta ne’e.

Gabriel Correira Sarmento, senti  kontente bele hetan ona oportunidade atu ba servisu iha Korea súl.

“Ha’u sente kontente tanba esforsu ne’ebé durante ha’u halo hakarak tebes ba servisu iha Korea Súl hodi apoiu ekonómia família nian, ohin loron konsege hetan duni oportunidade ida ne’e. Dook hosi família sente todan maibé hakarak família moris iha mudansa tenke la’o dook,” Gabriel Correia Sarmento, dehan ba Agência Tatoli, hafoin asina deklarasaun.

Iha fatin hanesan, traballadór Armandino do Rosário, mos senti  kontente tanba hetan oportunidade, maibé sente triste mós tanba hakarak família moris di’ak tenke dook hosi família.

“Ami ne’ebé hetan ona oportunidade atu ba servisu iha Korea Súl ne’e, ami deve ema-nia osan $3.000 mak foin ba. Tanba Estadu fasilita ami kursu no oinsa ami bele to’o fatin ho di’ak ne’e. Maibé osan viajen tama karantina hahú hosi Timor to’o Korea Súl ami rasik mak selu,” nia dehan.

Iha biban asina deklarasaun entre traballdór, família no Governu ne’e, Diretór Jerál Sekretáriu Estadu Formasaun Profesionál no Empregu (SEFOPE), Paulo da Silva, husu inan bainhira husik oan sira ba servisu tenke hanoin sira labele hakaas fali sira haruka osan mai halo lia moris no lia mate.

“Tanba ita iha ona esperénsia traballadór balu oho an tanba hanoin barak, no husu mós traballdór na’in 33 ne’ebé ohin hetan ona oportunidade atu ba servisu iha Korea Súl buka osan rai didi’ak nune’e bele hadi’a ekonómia familía nian no fila mai bele dezenvolve ita-nia rai,” nia dehan.

Nune’e nia parte mós apela ba timor-oan ne’ebé hetan ona oportunidade ba servisu iha Korea Súl respeita ema-nia kultura, labele ses hosi sistema no hadomi malu nu’udar timor-oan nomos  labele aplika fali arte marsiál iha ema-nia rai.

Nune’e mos, Diretór Diresaun Nasionál Empregu Exteriór Filomeno Soares, hateten serimónia despedida no asina deklasaun hanesan konkordansia ida ne’ebé halo hosi família traballadór katak aseita oan, fen, ka la’en atu ba servisu Korea Súl, la’os Governu maka obriga.

“Nune’e mosu problema ruma parte rua iha hotu responsabilidade hodi resolve. Prorgama haruka traballadór ba servsisu iha rai-liur, atu bele halo kontente família, la’os atu halo família fahe malu. Tanbá ne’e husu ba traballadór sira ba servisu kontaktu nafatin hó família, no família sira iha Timor labele halo problema hodi prezudika sira nia servisu. Tanba iha Korea Súl sira hasoru servisu ne’ebé todan tebes,” nia hateten.

Traballadór timor-oan na’in 33 ne’ebé ohin hetan oportunidade ne’e sei aranka Korea Súl iha loron domingu 19 fevereiru 2023. Sira ne’e sei ba servisu iha área peska. 

Jornalista : Arminda Fonseca

Editora : Armandina Moniz

iklan
iklan

Leave a Reply

iklan
error: Content is protected !!