DÍLI, 16 fevereiru 2022 (TATOLI) – Tribunál Distritál Dili (TDD), liuhosi Juiz Titulár Ivan Suritai adia interogatóriu ba aban, sesta-feira, tuku 11:00, ba suspeitu JDC ne’ebé envolve abuzu seksuál ba minoridade.
Juiz Titulár ba prosesu ne’e prezide hosi Ivan Suritai, MP reprezenta hosi Prokuradór Renato Berenahak, arguidu hetan asisténsia legál hosi Advogadu privadu Miguel Faria, Advogada Idalina no Advogadu privadu ida tán.
Iha interogatóriu dahuluk, Ministériu Públiku ne’ebé reprezenta hosi Prokuradór Renato Berenahak, promove arguidu ho krime abuzu sexuál ba minoridade ne’ebé previstu iha artigu 177 Kódigu Penál Timor-Leste.
Perante interogatóriu, MP ne’ebé reprezenta hosi Prokuradór Titulár Renato Berenahak iha nia alegasaun husu ba Tribunál atu aplika prizaun preventiva ba arguidu Jdc.
Enkuantu parte defeza arguidu JdC, solisita ba Tribunál atu tetu tuir Juiz nia haree ba krime ne’ebé arguidu komete no ikus mai Tribunál deside no adia ba aban hafoin lee sai despaisu ikus hosi prosesu ne’e..
Tuir observasaun TATOLi iha terrenu nota, hafoin interogatóriu ba arguidu JdC, bainhira jornalista sira tenta atu hasai arguidu nia foto, hetan impedementu hosi arguidu JdC nia espoza no família arguidu nia iha TDD hodi bandu jornalista sira atu labele hasai filmajen iha fatin refere no mosu diskusaun entre jornalista ho espoza no família arguidu sira.
Rekorda katak Polísia Nasional Timor-Leste (PNTL) liuhosi Departementu Investigasaun Kriminál (DIK), Komandu Jerál PNTL, ezekuta mandadu detensaun hosi Tribunál hodi detein suspeitu ho insiál JdC, tanba envolve iha kazu violasaun seksuál hasoru minoridade ne’ebé previztu iha artigu 177 hosi Kódigu Penál Timor-Leste.
Suspeitu ho inisiál JdC envolve iha krime abuzu seksuál hasoru minoridade iha tinan 2022.
Kazu ne’ebé suspeitu JdC envolve ne’e, nu’udar krime kontinuasaun, tanba ne’e Ministériu Públiku promove ba Tribunál hodi husu mandandu detensaun, nune’e Tribunál hasai mandadu, hodi husu polísia detein suspeitu.
PNTL liuhosi Departementu Investigasaun Kriminál iha tersa (14/2) loraik tuku 17:00 ezekuta mandadu refere, hodi lori suspeitu JdC iha nia rezidénsia Audian, ba sela Komandu PNTL Munisípiu Dili, hodi detein kedan supeitu JdC iha sela detensaun Komandu Munisipiu Dili, hodi kumpre detensaun durante oras 72.
Jornalista: Natalino Costa
Editór : Zezito Silva
