AMC sei konstrui lixeira rua iha merkadu Camnasa
COVALIMA, 17 fevereiru 2023 (TATOLI)—Administrasaun munisípiu Covalima (AMC) liuhosi dirasaun Servisu Munisipál Jestaun Merkadu no Turizmu sei konstrui lixeira rua iha merkadu foun suku Camnasa.
Notísia Relevante: AMC la prevee orsamentu monta kaixote lixu iha merkadu Camnasa
“Planu atu halo jestaun lixu hodi konstrui lixeira iha merkadu foun, agora laiha orsamentu ba kapitál dezenvolvimentu. Entaun ami-nia planu seidauk bele implementa hanesan konstrui lixeira iha merkadu ne’ebé ita presiza konstrui lixeira foun iha merkadu foun Camnasa foun ba sidadaun sira atu soe lixu,” Diretór Servisu Munisipál Jestaun Merkadu no Turizmu, Vitorino do Carmo, hateten ba Agência Tatoli, iha Bairru Costa, sesta ne’e.
Autoridade Covalima seidauk konstrui lixeira iha merkadu Camnasa, tanba iha merkadu refere negosiánte sira uza iha loron sábadu de’it maibé SMJMT kontinua fahe informasaun ba negósiante sira labele soe lixu arbiru.
“Ita hatene sábadu foin hala’o bazar, entaun ami kontinua habelar informasaun hodi husu ba negósiante sira, husi uma lori produtu lokál mai merkadu maibé fila ba uma lori lixu fila ba uma. Signifika lixu ne’ebé prodús tau iha saku hodi soe iha fatin lixu ne’ebe ita identifika,” nia hateten.
Tuir observasaun Agência Tatoli iha terrenu nota katak, Servisu Munisipál Jestaun Merkadu no Turizmu seidauk konstrui lixeira iha merkadu Camnasa. Maibé sira identifika ona fatin atu halibur lixu, nune’e negósiante labele soe lixu iha merkadu, hodi kria ambiénte ne’ebé la saudavél.
Jornalista : Celestina Teles
Editór : Cancio Ximenes
