CNE Oé-Cusse teste kandidatu ofisiál 274 prepara ba eleisaun parlamentár
OÉ-CUSSE 17 fevereiru 2023 (TATOLI) – Komisaun Nasionál Eleisaun (CNE, sigla portugés) iha Rejiaun Administrativa Espesiál Oé-Cusse Ambeno (RAEOA), kinta ne’e hala’o teste eskrita ba kandidatu 274 ne’ebé pasa ona selesaun dokumentu hodi sai ofisiál monitorizasaun iha eleisaun parlamentár 2023.
Direitór CNE Oé-Cusse, Tomás Oqui Meta, informa, teste ne’e hala’o loron ida realiza iha salaun parókia Numbei, no kandidatu 274 ne’e pasa ona iha selesaun dokumentu, bazea ba vaga ne’ebé CNE presiza hamutuk 115.
“Ohin ita fó teste ba kandidatu 274, atu prepara ba eleisaun parlamentár, tanba CNE Oé-Cusse sei rekruta ema na’in-115 hodi sai ofisiál supervizaun eleitorál eleisaun parlamentár tinan ne’e,” Tomás Oqui Meta informa ba Agência Tatoli iha Oé-Cusse.
Nia informa, rezultadu hosi teste ne’e sei publika iha loron 20 fevereiru ne’e, faze tuir mai maka tama teste orál ka entrevista ba kandidatu ne’ebé liu iha teste eskrita ne’e, hala’o iha loron 22 to’o 25 fevereiru no taka sai rezultadu finál iha loron 27 fevereiru 2023.
“Tanba asina kontratau sei hala’o iha loron 01 marsu 2023 depois kontinua hahú tama servisu, formasaun ba kandidatu sira iha loron 06 to’o 10 marsu 2023, no ofisiál na’in-115 ne’e sei koloka sira ba iha sentru votasaun no estasaun votasaun sira iha territóriu Oé-Cusse, no mós halo supervizaun iha atividade eletorál kampaña nian,” nia katak.
Entretantu, tuir dadus Sekretariadu Tékniku Administrasaun Eleitorál (STAE) rejista iha tinan 2022 ho totál eleitór provizória iha Oé-Cusse hamutuk 53.153, komposta hosi mane 27.407 no feto 26.106, ho totál sentru votasaun hamutuk 80 no estasaun votasaun 115.
Purtantu, Prezidente Repúblika José Manuel Ramos Horta, dekreta ona loron eleisaun parlamentár ne’e sei akontese iha 21 maiu tinan ne’e.
Atu konkore iha eleisaun parlamentár 2023, daudaun ne’e CNE anúnsua ona partidu polítiku hamutuk 24 mak sei konkore iha eleisaun parlamentár, nune’e mós STAE deklara ona katak períodu kampaña eleitorál ba eleisaun parlamentár ne’e hahú iha 19 abríl 2023.
Jornalista: Abílio Elo Nini
Editór: Evaristo Soares Martins
