DILI, 17 fevereiru 2023 (TATOLI)—Ministériu Transporte no Komunikasaun (MTK), liuhosi Diresaun Nasional Transporte no Terrestre (DNTT) iha tinan 2022 fó sansaun multa ba bus 11 tanba halo operasaun Dili ba munisípiu hasa’e tarifa tuir sira-nia gostu ka hakarak.
“Iha tinan 2022, ita fó sansaun multa ba bus 11. Hosi total ne’e, neen (6) hosi Lospalos, haat (4) hosi Baucau no ida hosi Viqueuqe. Multa ne’ebe sira selu ho totál orsamentu hamutuk $1.100. Ida ne’e, tanba kada bus ida multa $100,00,” Diretór Nasional Transporte no Komunikasaun, António da Costa dehan ba Agência Tatoli, iha nia-knaar fatin, Balide Dili, sesta ne’e.
Nia dehan, kona-ba tarifa bus ne’ebé Governu fó sai kada munisípiu folin la hanesan, no selu tuir hahú hosi kapitál Dili to’o kapitál munisípiu sira.
Tarifa sira mak hanesan, Dili-Manatuto ho presu $2.00, Dili-Baucau $4.00, Dili-Lospalos $8,00, Dili-Viqueque $8,00, Dili-Aileu $2,00, Dili-Same $9,00, Dili-Ainaro $8,00, Dili-Suai $12,00, Dili-Ermera $3,00, Dili-Liquiça $2,00 no Dili-Maliana $6,00.
“Hosi tarifa ne’e, pasajeiru sa’e karreta hosi kapitál Dili to’o kapitál munisípiu sira tenke selu tuir tarifa ne’ebé iha maibé liu ida ne’e ita boot sira iha direitu halo keixa mai iha DNTT nune’e ita bele fó sansaun multa ba sira,” nia dehan.
Nia hatutan, tarifa ne’ebé pasajeiru sira selu hahú hosi kapitál Dili to’o kapitál munisípiu sira, maibé hosi kapitál ba fali postu administrativu ida ne’e MTK seidauk iha regulamentu ruma atu regula.
“Ita-nia tarifa ne’e ba de’it kapitál munisípiu maibé hosi munisípiu ba fali postu administrativu ita seidauk iha regulamentu entaun bus sira hasa’e folin ita seidauk bele fó sansaun. Maibé ita mós iha ona planu sei halo regulamentu tarifa ba bus sira tula pasajeiru hahú hosi kapitál Dili ba munisípiu to’o postu administrativu sira,” nia dehan.
Diretór DNTT ne’e husu ba públiku sé mak sente sai vítima hakat ba DNTT halo keixa tanba tarifa ba bus sira Governu fó sai iha ona.
“Maneira imi halo keixa mak, hatene bus nia naran no plat karreta bele mai halo keixa mak ita fó sansaun ba sira, maibé labele lansa de’it fali informasaun iha mídia sosiál,” António dehan.
Jornalista : Arminda Fonseca
Editora : Armandina Moniz
