Komisaun D-Governu diskute projetu-lei Seguransa, Saúde no Ijiene iha Serbisu
DILI, 17 fevereiru 2023 (TATOLI)-Komisaun D trata asuntu Ekonomia no Dezenvolvimentu iha Parlamentu Nasionál (PN), sesta ne’e, hala’o audiénsia públika hodi konvida Governu ho entidade relevante diskute projetu-lei númeru 50/V(5a)-Seguransa, Saúde no Ijiene iha Serbisu.
Entidade ne’ebé komisaun hala’o audénsia ho mak Sekretária Estadu Formasaun Profisionál no Empregu (SEFOPE), Konsellu Sindikatu Nasionál Traballu (KSNT) no tuir planu sei konvida mós parte sira seluk tan.
“Ohin, SEFOPE ho Konsellu Sindikatu Nasionál Traballu ho Arbitrazen mai atu fó sira-nia hanoin kona-ba projetu-lei Seguransa, Saúde no Ijiene iha fatin serbisu ne’ebé komisaun D halo,” Prezidente Komisaun D, Antoninho Bianco, hateten ba jornalista sira iha PN
Nia hateten, ida-ne’e liga ba lei traballu eziste hela maibé ho projetu-lei ne’e oinsá tenke kria fatin serbisu ne’e asegura ho seguransa, saúde no ijiene ba ema-ne’ebé serbisu hanesan ekipamentu tenke uza tuir natureza serbisu hanesan farda ho seluk tan, hanesan iha loza, kompañia, portu, aeroportu ho sira seluk.
“Atu nune’e seguransa ema-ne’e projete, saúde mós tenke di’ak ho fatin ijiene ba kompañia privadu sira. Tanba ne’e, ohin, ami konvida sira atu mai fó sira-nia hanoin, halo melloramentu ba lei ne’e iha artigu 64. Eentaun trata tuir prinsípiu jerál ne’ebé tuir konvensaun internasionál no iha fatin-fatin bele uza. Tanba ne’e, ohin fó sira-nia hanoin liu-liu empregadór ka kompañia sira ho ema sira-ne’ebé fó serbisu ba traballadór sira tenke prepara mós ekipamentu saida prenxe kriteira ka lae atu proteje traballadór,” nia hateten.
Dadaun ne’e, iha lei traballu eziste ona maibé tenke haree ba lei seguransa traballadór tenke fó seguransa ba sira, tan ne’e iha projetu-lei ne’e trata diretu no dever, aplikasaun sansaun mós iha bainhira la kumpre inklui proibi labele obriga inan-feton gravida halo serbisu todan no halo de’it serbisu kmaan, nune’e empregadór iha direitu atu proteje traballadór sira.
Inisiativa lejislativa ne’e iha konsensu entre deputadu sira hosi bankada parlamentár iha komisaun D.
Sekretáriu Estadu Formasaun Profisionál no Empregu (SEFOPE), Alarico do Rosario, hateten sira-nia parte hetan konvite hosi PN liuhosi komisaun ne’e hodi halo konsulta ba projetu-lei Seguransa Saúde traballadór iha Timor-Leste.
Tanba ne’e, SEFOPE fó hanoin katak lei ne’e importante tebes atu bele hetan aprovasaun hosi PN óinsa atu asegura traballadór timoroan sira bainhira hetan asidente iha serbisu fatin nune’e lei ne’e sei asegura.
“Lei ne’e importante tebes óinsa tau atensaun asegura traballadór sira bainhira hetan asidente iha serbisu fatin hanesan monu kanek ka mate. Ita iha lei traballu maibé ladún forsa, tan ne’e projetu-lei ne’e kria espesífiku liután liu-liu ba saúde no seguransa,” nia hateten.
Enkuantu bainhira komisaun D ramata audiénsia públika mak sei halo relatóriu no paresér hodi envia ba meza PN hodi bele ajenda diskusaun iha plenária faze jeneralidade.
Jornalista : Nelson de Sousa
Editór : Cancio Ximenes
