MAPKOMS inaugura Rádiu Komunidade Lian Proklamadór iha Turiscai
DILI, 17 fevereiru 2022 (TATOLI) – Ministru Asuntu Parlamentár no Komunikasaun Sosiál (MAPKOMS), Francisco Jerónimo, akompaña hosi autoridade lokál hosi Postu Turiscai, lia-na’in no komunidade sira, inaugura Rádiu Komunidade Lian Proklamadór 99.4 Mhz ne’ebé lokaliza iha Postu Administrativu Turiscai, Munisípiu Manufahi.
Ministru MAPKOMS, Francisco Jerónimo, hateten ho inagurasaun ba Rádiu Lian Proklamadór ne’e atu valoriza Proklamadór Francisco Xavier do Amaral.
“Ita ohin inaugura Rádiu Komunidade ho naran Lian Proklamadór, ho presenza Rádiu ida ne’e atu ajuda komunidade sira asesu ba informasaun no mós Rádiu Lian Proklamadór ne’e atu fó valorizasaun ba ita-nia proklamadór Francisco Xavier hodi hatutan nia mehi liuhosi asesu ba informasaun. Entaun rádiu ne’e importante”, MAPKOMS Francisco Jerónimo dehan iha inaugurasaun Rádiu Komunidade Lian Proklamtór, sesta ohin.
Hi presenza Rádiu Lian Proklamadór nian ne’e, Governante ne’e husu ba jornalista ne’ebé serbisu iha rádiu ne’e atu halo kobertura ba suku sira ne’ebé iha Postu Administrativu Turiscai laran, atu ema hotu bele asesu informasaun ho di’ak liuliu bele prosesu dezenvolvimentu iha suku sira iha Turiscai.
“Ita-bo’ot sira iha obrigasaun, ho prezensa rádiu komunidade ne’e tenke halo kobertura tama sai suku entrevista autoridade lokál hodi fó sai problema no difikuldade no progresu saida mak suku ne’e iha hodi divulga ba ema bele akompaña”, nia hateten.
Ministru husu ba komunidade sira hosi Postu Administrativu Turiscai hodi kuidadu rádiu Lian Proklamadór atu garante nia funsionamentu no sustentabilidade.
“Ha’u husu ita-boot sira-nia konsiénsia atu tau atensaun no kuidadu rádiu ne’e atu nia bele moris”, nia afirma.
Ezekutivu ne’e husu mós ba komisaun instaladora rádiu atu kompleta lalais estrutura rádiu proklamadór iha Turisacai atu hetan osan transferénsia públika hosi Governu, tanba maske rádiu ne’e komunidade mak iha responsablidade maibé Governu la taka matan atu apoia rádiu komunidade hodi garante nia funsionamentu.
“Governu la taka matan ba rádiu komunidade sira. Ami sei apoiu liu rádiu komunidade tanba husu ba ita-bo’ot kompleta atu imi hetan osan transferénsia públika rádiu komunidade sira”, Governante ne’e fó hanoin.
Iha fatin hanesan, Administradór Postu Administrativu Turiscai, Adriano da Costa, agradese Governu liuhosi MAPKOMS tanba apoia komunidade Turiscai hodi bele instala rádiu komunidade ida ho naran Lian Proklamadór ida ne’e. Ne’e previléjiu ba komunidade Turiscai tomak.
“Tanba ne’e, husu ba komisaun instaladór hamutuk ho autoridade postu ,komunidade sira tomak atu kuidadu rádiu komunidade ida ne’e; atu mate ka moris iha ita-nia liman, ita mak husu ita mak tenke kuidadu kuandu husik ne’e ita mak lakon”, nia enkoraja.
Autoridade ne’e agradese mós ba MAPKOMS Francisco Jerónimo tanba bele marka prezensa hodi inaugura Rádiu Komunidade Lian Proklamadór.
“Ami povu Turiscai hato’o ami-nia agradesimentu ba MAPKOMS bele aseita proposta instalasaun rádiu ida ba povu Turiscai. Ami agradese tebes ho rádiu komunidade bele ajuda komunidade bele asesu informasaun ho di’ak”, nia kongratula.
Entretantu, Rádíu Komunidade Lian Proklamadór mai ho insiativa komunidade iha Postu Administrativu Turiscai rasik. Inisiativa harii rádiu komunidade ne’e mai kedan iha 2011.
Proposta ba instalasaun Rádiu Kominidade Lian Proklamatór hatama iha 2019 no hetan aprovasaun hosi Ministru Asuntu Parlamentár Komunikasaun Sosiál (MAPKOMS) Francisco Jerónimo iha 2022 no iha janeiru 2023 ne’e halo aprova no tuirmai halo lansamentu.
Jornalista: Natalino Costa
Editór : Zezito Silva
