SECoop fó formasaun kontabilidade ba dirijente membru koperativa Habuna
COVALIMA, 17 fevereiru 2023 (TATOLI)—Governu liuhosi Sekretária Estadu Kooperativa (SECoop, sigla portugés) fó formasaun kontabilidade ba dirijente membru kooperativa Haburas Unidade Naroman (Habuna) no halo diálogu ho komunidade iha aldeia Holba, suku Taroman, postu administrativu Fatululik, munisípiu Covalima.
“Ha’u ko’alia jerál de’it tanba formadór- ira iha ne’e hela, fó formasaun durante loron rua ba ita-boot sira. Ami mai enterompe tempu hosi matéria balun atu fó formasaun maibé sei prienxe fali,” Sekretáriu Estadu Kooperatova, Elizario Ferreira, hateten liuhosi nia diskursu iha aldeia Holba, suku Taroman, sesta ne’e.
Iha dezembru 2022, nia dehan, Governu estabelese ona kooperativa 452 ne’ebé rejista ona nia membru 117,800-resin, fahe ba kooperativa kreditu hamutuk127 ne’ebé akomoda ona membru 42000 ho akomoda osan 34 juta, maibé koperativa ho kapitál boot iha koperativa hitu (7).
“Koperativa iha RAEOA ha’u estabelese iha 2003 ho nia kapitál $2,4, iha Maliana estabelese iha tinan 2004 iha kuluhun ho kapitál $2,7. Estabelesese kooperativa ne’e di’ak ho razaun ha’u koñese di’ak kooperativa 325, agora iha ona osan juta $38. Entaun, Governu promove bainhira laiha sede kooperativa,” nia dehan.
Administradór munisípiu Covalima, Francisco de Andrade, hateten atividade ne’e fó formasaun ba membru kooperativa no halo diálogu ho komunidade oinsa lori membru Governu hakbesik ba komunidade iha área rurál sira.
“Ita-nia Sekretáriu Estadu Kooperativa hakat mai iha aldeia Holba, tuir loloos ita fó formasaun no diálogu realiza iha Fatululik maibé iha Fatululik realiza beibeik ona oinsá lori membru Governu hakat mai iha área rurál. Ita mai fó formasaun no halo diálogo ho ita-nia komunidade,” nia dehan.
Estabelese kooperativa iha Holba hahú ho kapitál $500 maibé agora iha ona mudansa osan kooperativa sa’e ona ba $8000-resin, ne’e hatudu katak nia kompromisu atu estabelese kooperativa refere ba futuru di’ak.
Ho nune’e, nia dehan, iha oportunidade ida-ne’e hanesan iha Timor-Leste hetan apoiu hosi ajénsia internasionál sira hodi apoiu osan hodi estabelese organizasaun oioin hahú agrikultura maibé tanba dependensia boot.
“Ita lakohi kosar simu tiha osan hanoin hakarak gasta de’it maibé tenke hanoin atu kontinua ba oin tenke iha transparénsia. Agradese ba ita-boot sira hahú ho kapitál $500 to’o ona $8000- resin,” nia hateten.
Jornalista : Celestina Teles
Editór : Cancio Ximenes
