iklan

EKONOMIA, HEADLINE, MUNISÍPIU, OÉ-CUSSE (RAEOA), POLÍTIKA

TIC Timor realiza semináriu garante transparánsia mellora prestasaun servisu públiku iha RAEOA

TIC Timor realiza semináriu garante transparánsia mellora prestasaun servisu públiku iha RAEOA

TIC Timor realiza semináriu ba entidade sira iha RAEOA garante transparánsia mellora prestasaun servisu públiku iha rejiaun ne’e. Imajen Tatoli/ Abílio Elo Nini.

OÉ-CUSSE 17 fevereiru 2023 (TATOLI) – Ajénsia Teknolojia Informasaun Timor Institutu Públiku, (TIC Timor IP), sesta ne’e realiza semináriu ba entidade sira iha Rejiaun Administrativa Espesiál Oé-Cusse Ambeno (RAEOA) kona-bá dijitalizasaun hodi garante transparánsia atu mellora prestasaun servisu públiku iha rejiaun ne’e.

Semináriu ne’e abertura direitamente hosi Prezidente Autoridade RAEOA, Arsénio Paixào Bano, ne’ebé realiza iha otél Ambeno, no partisipa iha semináriu nee’e mai hosi membru Autoridade RAEOA, diretór, xefe departamentu sira no funsionáriu sira.

Iha abertura ne’e, Arsénio Paixão Bano, orgullu, tanba bele fasilita servisu públiku, liuliu diretór, xefe departamentu no sekretáriu Rejionál sira fasil bele kontrolu to’o funsionáriu sira, importante tanba atu mellora prestasaun servisu públiku no garante transparánsia.

“Tán ne’e, ha’u interesadu tebes atu tama iha diskusaun ne’e, sei iha aplikasi karik bele kria ida espesiál ba RAEOA ninian, nune’e bele kontrola sasán Estadu inklui transporte sira, ida-ne’e mós atu garante transparánsia atu mellora prestasaun servisu públiku iha Oé-Cusse,” Arsénio Bano, ko’alia iha otél Ambeno Oé-Cusse.

Tuir Arsénio Paixão Bano, bainhira tama ona iha Governu dijitalizasaun, sei fasil atu kontrola komunika ba malu hamenus sura-tahan, dadús sira-ne’e susar atu lakon, kontrolu ba ita hotu hosi leten to’o kraik no komunikasaun ho Governu Sentrál ne’e fasíl ba servisu esensiál sira.

Iha biban ne’e, Diretór Dezenvolvimentu Sistema Iinformasaun no Aplikasaun, Justo Fernandes, hatete, Ajénsia TIC Timor realiza semináriu ne’e atu habelar informasaun relasiona ho teknolojia Governu dijitál, tanba tekonolojia mak sei sai nu’udar mata dalan ba servisu lor-loron iha Governu no atividade ekonomia moris tomak.

Nia dehan, Ajénsia TIC Timor foin eziste tinan lima estabelese iha 2017, maibé servisu balu ajuda ona Estadu Timor-Leste iha área téknolojia ninian, nune’e semináriu ne’e bele introdús saida mak halo ona no saida mak sei ajuda RAEOA, liuliu teknolojia.

“Tanba TIC Timor fornese ona servisu teknolojia iha munisipíu hotu-hotu no ikus mak iha RAEOA, la’ós servisu de’it, maibé ita mós koloka ona funsionáriu sira iha munisipíu atu garantia sustentabilidade ba iha infraestrutura no sistema sira-ne’ebé iha,” nia katak.

Nia esplika, semináriu ne’e sei introdús pontu prinsipál rua ne’ebé importante, primeiru preparasaun pre-kondisaun saida mak presiza halo, nune’e bele integra iha era dijitál, segundu nian maka sá benefísiu saida maka sei hetan iha Governu eletrónika.

“Entaun dijitalizasaun ne’e, teknolojia nia papél importante atu ajuda sidadaun hotu hodi hafasil ita-nia servisu no mós bele asesu ba iha Governu nia servisu,” nia afirma.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!