UNTL-KHOSORTIL konvida PR Horta kolleta sorgum iha Lautém

DILI, 17 fevereiru 2023 (TATOLI)—Komunidade Hadomi Sorgum Timor Leste (KHOSORTIL) hamutuk ho Universidade Nasional Timor-Leste (UNTL) ho parseiru konvida Prezidente Repúblika, Jose Ramos Horta, atu kolleta Sorgum iha munisipiu Lautém.

“Ohin mai atu konvida Prezidente hodi ba kolleta sorgum iha Lautém, iha aldeia Titilari, Lospalos iha loron 18 abríl 2023,” Koordenadora K-HOSORTIL, Brigida Antonia Correia, hateten ba jornalista sira iha Palásiu Prezidente Nicolau Lobato, Bairru Pite, kinta (16/02/23).
Koordenadora ne’e dehan, sorgum ne’e nia promove liu peskiza hamutuk ho estudante finalista Agropekuária Fakuldade Agrikultura UNTL hahú fulan-marsu 2022, tanba ne’e sira mai konvida Prezidente atu kolleta.
Nia haktuir, UNTL hamutuk ho parseiru inklui mós KHOSORTIL rasik lansa ona iha 20 de setembru tanba ne’e ohin mai husu posiblidade hodi bele halo kolleta.
“UNTL hamutuk ho parseiru sira nomós komunidade Hadomi Sorgum Timor Leste ne’ebé mak lansa ona loron 20 setembru, nune’e ohin ami mai hato’o ba Prezidente katak durante ne’e ami halo peskiza hamutuk ho komunidade sira nia rejultadu sai di’ak tanba sorgum ne’e hanesan aihan produtivu ida ita bele utiliza sai hanesan aihan ba ema no mós aihan ba animál,” ni dehan.
Oras ne’e daudaun taxa importasaun sa’e no masin-imidar mós folin sa’e halo komunidade labele sosa, entaun oinsá dezenvolve sorgum sai hanesan masin-midar nune’e povu bele utiliza ajuda ekonomia rai-laran no sorgum iha tinan ida-ne’e bele kolleta dala tolu (3) ka dala haat (4).
Reitór Universidade Nacional Timor Lorosa’e (UNTL), João Soares Martins, hateten ohin hosi Universidade Nacional Timor Lorosae hamutuk ho peskizadór no bainaka hosi Indonézia hamutuk Komunidade Hadomi Sorgum iha Timor-Leste hasoru Prezidente Republika hodi ko’alia kona-ba produsaun sorgum.
“Ami hasoru diskute ho Prezidente Repúblika kona-ba programa oinsá prodús sorgum iha Timor Leste, tanba Koodernadora Brigida hahú ona iha Lospalos, tanba sorgum ne’e hanesan produtu alternativu ida hanesan foos no batar no ai-farina sira-ne’e,” nia dehan.
Sorgum ne’e, nia dehan, sai hanesan alternativu ida no di’ak tebes tuir peskiza ne’ebé mak hatudu katak ne’e ajuda menu di’ak redús má nutrisaun, di’ak ba labarik sira no sorgum mós bele prodús sai masin-midar, sai kosmétika no sira dezenvolve ne’e di’ak tebes.
Aleende ne’e, nia hateten, sorgum sai hanesan aihan alternativu ba komunidade liu-liu ba labarik sira no sai mós hanesan produtu hodi esporta ba rai-li’ur, tanba produsaun sorgum ne’e ba fulan tolu de’it.
Iha biban ne’e, Xefe Estadu, Jose Ramos Horta, hatete nia parte aseita ho konvite ne’ebé mai hosi parte UNTL hamutuk Komunidade Hadomi Sorgum Timor-Leste, nia sei marka prezensa hodi kolleta sorgum iha Lautém.
Jornalista : Osória Marques
Editór : Cancio Ximenes

