Viqueque-oan tenke kontribui ba pás no estabilidade iha kampaña no ElPar
VIQUEQUE, 17 fevereiru 2023 (TATOLI)— Administradór Munisípiu Viqueque, Januario Soares “Bolly”, husu ba populasaun iha munisípiu Viqueque atu mantein ka kontribui ba pás no establidade iha ámbitu kampaña no Eleisaun Parlamentár (ElPar) ne’ebé sei akontese loron 21 maiu 2023.
Prezidente Repúblika dekreta ona loron kampaña iha loron 19 abríl no Eleisaun Parlamentár iha loron 21 maiu 2023.
“Hahú fulan abríl partidu polítiku sira halo kampaña hotu no ita sei tama eleisaun parlametár, nune’e ha’u husu ba populasaun Viqueque tenke kria pás no establidade hodi hasoru eventu dekmokrásia ne’e”, Januario Soares “Bolly”, hateten ba Agência Tatoli, iha ninia kna’ar fatin administrasaun munisípiu Viqueque, sesta ne’e.
Tanba, Administradór Bolly dehan tama iha kampaña polítika ne’e líder partidu polítiku sira sei hato’o sira nia programa, nune’e presiza akompaña ho dame hodi bele eskolla partidu ne’ebé tuir ida-idak nia konsensia.
“Ita sidadaun iha ninia dever maka partisipa bá vota, la presiza tan kria problema. Ha’u konvida ona líder arte marsiál ne’ebé eziste iha munisípiu Viqueque atu kontribui ba pás no establidade iha munisípiu Viqueque”, nia hato’o.
Autoridade munisípiu Viqueque halo ona liña koordensaun entre autoridade seguransa parte Polísia Nasionál Timor Leste (PNTL) munisípiu Viqueque hodi dezloka ba postu administrativu sira atu apela ba populasuan sira oinsá atu kria pás no establidade iha ámbitu kampaña no eleisaun parlamentár bele la’o susesu iha munisípiu Viqueque.
“Ita nasaun kuandu establidade la’o di’ak, ita fó kontribui ba Governu hodi implementa sira-nia programa iha nasaun Timor-Leste. Nune’e tempu badak ha’u sei hamutuk ho PNTL desloka ba postu adiministrativu lima hodi apela ita-nia sidadaun sira atu bele kria pás”. nia hakresneta.
Jornalista: Vitorino Lopes da Costa
Editór : Florencio Miranda Ximenes
