DILI, 18 fevereiru 2023 (TATOLI)- Sekretariadu Tékniku Administrasaun Eleitorál (STAE), Munisípiu Dili, sábadu ne’e, realiza ezame eskrita ba kandidatu sira ne’ebé liu iha selesaun dokumentu ba vaga brigada no Pontu Fokál hodi hala’o servisu iha Eleisaun Parlamentár ne’ebé sei hala’o iha loron 21 maiu 2023.
Diretór STAE Munisípiu Dili, Mariano de Jesus, fó sai katak, kandidatu ne’ebé pasa iha selesaun dokumentu no kontinua ba teste eskrita hamutuk 872 ba vaga 152.
“Vaga ba Brigada 142, pontu fokál na’in-lima, totál kandidatu brigadista hamutuk 765, pontu fokál 107, ne’e kompete ba vaga lima de’it ba postu lima ne’ebé ejiste iha Munisípiu Dili. Brigadista vaga hamutuk 147 ba postu lima”, Responsável STAE Dili ne’e informa, molok realiza ezame, iha Jináziu Munisípiu Dili.
Biban hanesan, Diretór Nasionál STAE Leonardo Amaral, konsidera teste eskrita ne’e nu’udar kompetisaun ida maka’as tanba kandidatu barak liu vaga ne’ebé iha.
“Ida ne’e kompetisaun ida maka’as ho vaga ne’ebé limitadu, kandidatu barak. Ho ida ne’e ha’u husu katak, karik pergunta la klaru bele husu ba meja, labele husu ba sorin-sorin, nune’e halo sira seluk konfunde no la foku”, Diretór nasionál ne’e sujere.
Tanba ne’e, nia husu ba kandidatu sira atu prienxe ho kuidadu, no labele halo barullu durante ezame la’o.
Munisípiu Dili mak ikus ba realizasaun exame eskrita tanba ezame hanesan hala’o tiha ona ba Munisípiu seluk iha territóriu nasionál
“Ezame ba iha Dili nian halo dala-ida de’it entaun matéria ne’ebé mak atu fó labocor tanba ne’e agradese ba ekipa realzia ona ezame ne’e. Husu mós atu telemovel tau iha silensiu, ekipa ne’ebé mak monitoriu kuandu dezlobre kandidatu ruma kopia ka lori buat ne’ebé kontra regra sira ekipa sei elimina”, nia apelu.
Enkuantu, Rezultadu teste sei fó sai iha semana oin.
Jornalista : Antónia Gusmão
Editór : Florencio Miranda Ximenes
