Viqueque : CNE sei fó edukasaun sívika ba sidadaun
VIQUEQUE, 19 fevereiru 2023 (TATOLI) – Diretór Komisaun Nasionál Eleisaun (CNE-portugés), Honorio da Cruz, hateten iha tempu badak, CNE Munisípiu Viqueque sei kontinua halo edukasaun sívika ba sidadaun sira hodi eduka votante sira vota ho loloos iha eleisaun parlamentár.
“Tempu badak nia-laran, ami sei kontinu realiza edukasaun sívika ba ita-nia sidadaun no estudante eletór foun atu sira bele hatene kona-ba vota ho di’ak no loloos. Agora ami sei halo preparativu ba matéria edukasaun sívika nian no ami sei uza métodu lian ida-ne’ebé fasil ba sidadaun sira atu kompriende”, Honorio da Cruz, hateten ba Agência Tatoli, iha ninia knaar fatin, sábadu ne’e.
Diretór CNE Viqueque hatutan, liuhosi edukasaun sívika, CNE bele fahe informasaun sira kona-ba lala’ok eleisaun parlamentár, sei ko’alia mós sistema eleisaun parlamentár no prosesu kontajen votasaun nian.
“Sidadaun eletór sira bele kompriende tanba ne’e husi edukasaun sívika bele enkoraja ita-nia eleitór hodi bele partisipa másimu iha eleisaun parlamentár. Ami sei esforsu oinsa maka maluk vuneravél sira bele partisipa no kria kondisaun ba maluk defisiente sira ba eleisaun parlamentár”, nia hato’o.
atu reforsa eduksaun sívika, nia dehan, CNE rekruta ofisiál supervizasaun hodi apoia ba atividade edukasaun sívika, kampaña no eleisaun parlamentár.
“Ami hahú simu dokumentu ba kandidatu supervizaun sira-nia dokumentu iha loron 2 to’o 8 fulan fevereiru, kandidatu pasa iha dokumentu hamutuk 212 no foin lalais loron 16 fulan fevereiru, ami fó texte eskrita ba kandidatu sira-ne’e, ami sei presiza 137 no na’in 135 sei koloka ba sentru votasaun, estasaun votasaun no na’in sei apoiu eskrítoriu CNE Viqueque”, nia relata.
Aleinde ne’e, nia dehan, CNE ho órgaun STAE Viqueque mantein kolabora ho di’ak hodi prepara ba eleisaun parlamentár, nune’e sei apoiu husi parte adiministrasaun munisípiu Viqueque, Bombeiru no Polísia Nasionál Timor Leste (PNTL) hodi fó susesu ba eleisaun.
Enkuantu sentru Votasaun estabelese iha Munisípiu Viqueque ba eleisaun parlamentár hamutuk 112 no estasaun votu hamutuk 135 no dadus eleitór Munisípiu Viqueque ho provizóriu, totál 58.867 kompostu husi mane na’in 29.938 no feto na’in 28.897.
Jornalista: Vitorino Lopes da Costa
Editór : Zezito Silva
