EDUKASAUN, MUNISÍPIU, VIQUEQUE

ESJ Calixa Viqueque enfrenta menus karteira eskolár

ESJ Calixa Viqueque enfrenta menus karteira eskolár

Estudante Ensinu Sekundáriu Jerál (ESJ) Calixa, postu Viqueque-vila, munisípiu Viqueque.Imajen/ Vitorino Lopes da Costa

VIQUEQUE, 20 fevereiru 2023 (TATOLI)— Diretór Ensinu Sekundáriu Jerál (ESJ) Calixa, postu Viqueque-vila, munisípiu Viqueque, Rozito Soares do Rosário, informa daudaun ne’e eskola Calixa, enfrenta menus fasilidade liuliu karteira hanesan banku no meza hodi fasilita estudante sira ba prosesu aprendijazen.

“Iha tinan ne’e, ami-nia hasoru difikuldade rekursu liuliu materiál hanesan banku no meza la sufisente tanba estudante númeru barak, nune’e kadeira no meza la to’o ba estudante sira uza ba iha  prosesu aprendijazen”,  Rozito Soares do Rosário, hateten ba Agência Tatoli, iha eskola Calixa, Beobe, segunda ne’e.

Ho menus fasilidade ne’e, Diretór ESJ Calixa ne’e hato’o pedidu ba Servisu Edukasaun Munisípiu Viqueque, maibé seidauk iha resposta ruma.

Ministériu Edukasaun Juventude no desportu (MEJD) distribui ona karteira ba eskola sira seluk iha Viqueque, maibé  ami eskola Calixa seidauk hetan.

“Ha’u husu ba Ministériu Edukasaun atubele apoiu materiál liuliu karteira liuliu banku no meza ba ami atubele fasilita estudante sira iha prosesu aprendijazen”, resposavél ne’e resposavél.

Aleinde karteira eskolár, Resposavél ne’e mós afirma kona-ba menus livru hanesan lian tetun, livru melaiu, livru relijiaun no livru desportu.

“Kona-ba livru ami halo pedidu ba kurríkulu nasionál iha MEJD, maibé ami seidauk hetan livru nune’e tinan ida-ne’e parte kurríkulu bele tau konsiderasaun”, nia hato’o.

Estudante ESJ Calixa klase ida na’in 156, klase-rua na’in-186 no klase-tolu na’in-123, ho totál na’in-465 no Profesor Calixa na’in-27, Permanente 18, Profesór kontratadu na’in-6, volutáriu na’in-tolu.

Responde kestaun ne’e, Diretór Serbisu Edukasaun Munisípiu Viqueque, Duarte Brandão, rekoñese iha eskola Calixa Viqueque-Vila no eskola sira seluk iha munisípiu Viqueque menus karteira eskolár.

“Ha’u seidauk hatene bainhira maka ministériu distribui tan kadeira no meza ba eskola sira. Enkuantu iha eskola EBF Kaiua, estudante sira tuur de’it iha rai maka simu materia”, nia afirma.

Jornalista : Vitorino Lopes da Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!