Governu inaugura edifísiu foun administrasaun postu Bobonaro
BOBONARO, 20 fevereiru 2023 (TATOLI) – Governu liuhosi Vise-Ministru Administrasaun Estatál (MAE), Lino de Jesus Torrezão, segunda ne inaugura edifísiu foun administrasaun postu administrativu Bobonaro, munisípiu Bobonaro hosi projetu reapropriasaun Programa Dezenvolvimentu Integradu Munisipál (PDIM) 2021 nian.
Vise-Ministru Lino de Jesus Torrezão, esplika, inaugura edifisiu foun ne’e hanesan jestu ida hosi VIII Governu Konstitusionál kria kondisaun ba postu, suku no aldeia hotu-hotu iha territóriu nasionál.
Notísia relevante: Governu distribui ekipamentu eletrónika ba xefe suku sira iha Bobonaro
“Iha postu mak ita hatene katak edifísiu ne’ebé daudaun ne’e hamriik, hosi suku maka ita hotu hatene iha reabilitasaun sede suku no uma uma naroman ba povu, ita hotu hatene katak ne’e kondisaun mínimu ne’ebé mak ita identifika iha postu hotu-hotu tanba ita atu tama ona ba desentralizasaun territorial,” nia katak.
Governante ne’e espera ho edifísiu foun ne’e servisu administrasaun postu bele la’o ho di’ak liután hodi halo atendimentu ba komunidade sira hosi suku to’o aldeia.
Prezidente Autoridade Munisípiu Bobonaro, Ernesto de Oliveira Barreto, konsidera dezenvolvimentu infraestrutura postu administrativu ne’e nu’udar esforsu hosi VIII Governu Konstitusionál.
“Ohin loron programa barak pasa iha Konsellu Ministru no programa barak mak ita-nia populasaun hetan benifísiu, ha’u mós agradese ba kontribuinte sira-ne’ebé fó ona kontribuisaun hodi halo inaugurasaun ba edifísiu foun ne’e.
Administradór postu administrativu Bobonaro, Juvinál Leto Mau dos Santos, agradese no orgulu ba governu ne’ebé iha polítika di’ak kontrui ona edifisiu foun ne’e ho espasu sufisiente ba funsionáriu sira atu halo servisu.
“Espera katak ho inaugurasaun edifísiu foun ne’e ho fatin sufisiente, natoon bele halo atendimentu ne’ebé di’akliu ba komunidade sira iha postu administrativu Bobonaro,” Administradór Juvinál dehan.
Enkuantu obra ne’e konstrui hosi empreza lokál Biabasan Mogen Lda ho totál kustu rihun $160-resin ne’ebé finansia hosi orsamentu kapitál dezenvolvimentu tinan fiskál 2021.
Tuir dadus estatístika autoridade munisípiu Bobonaro, postu administrativu Bobonaro iha aldeia 63, suku 18 ho totál populasaun 23,376 ho xefe família hamutuk 4,601.
Notísia relevante: Projetu reapropriasaun PDIM tolu iha Bobonaro atinje 60%
Jornálista : Sérgio da Cruz
Editór : Evaristo Soares Martins
