DILI, 20 fevereiru 2023 (TATOLI)– Konsellu Ministru estraordináriu aprova projetu ne’ebé aprezenta hosi Ministru Finansa, Rui Augusto Gomes, kona-ba partisipasaun Open Government Partnership no dezigna mós membru Governu ne’ebé responsável iha área finansa hanesan ninia reprezentante.
“Open Government Partnership ne’e hanesan inisiativa multilaterál ida, ne’ebé lansa iha setembru 2011, ho objetivu atu garante kompromisu konkretu Governu sira-nian ba promosaun transferénsia, fomentu partisipasaun públika, kombate ba korupsaun no utilizasaun teknolojia foun ba fortalesimentu demokrasia partisipativa”, Ministru Prezidénsia Konsellu Ministru, Fidélis Magalhães, afirma iha Palásiu Governu.
Nia hatutan, inisiativa ida-ne’e apoia reforma iha nível governamentál no sosiedade sivíl iha país membru sira liuhosi asisténsia ba planeamentu no implementasaun ba planu asaun sira no fasilita atu fahe esperiénsia no informasaun iha nivel rejionál no globál ho forma atu permite aprendijazen ho par sira.
Lembra katak, iha loron 28 novembru tinan 2022, Open Government Partnership avalia ona atu kumpri kritériu partisipasaun nian husi parte Timor-Leste, ne’ebé rezulta iha klasifikasaun mínima husi 75% ne’ebé konklui katak Governu timorense elejivel atu partisipa iha inisiativa multilaterál ida-ne’e.
Inisiativa multilaterál ne’e lansa iha 2011 husi Xefe Estadu no Governu sira husi nasaun ualu – Áfrika Súl, Brazíl, Estadu Unidu Amérika, Filipina, Indonézia, Méxiko, Noruega no Reinu Unido.
Jornalista: Antónia Gusmão
Editora: Maria Auxiliadora
