Ministru Finansa sei negosia ho Banku Mundiál ba projetu ‘HARII’
DILI, 20 fevereiru 2023 (TATOLI) – Konsellu Ministru autoriza Ministru Finansa, Rui Augusto Gomes, hodi hahú halo negosiasaun ho Banku Mundiál kona-ba kondisaun espesífika husi empréstimu ba projetu “Timor-Leste Healthcare Action Through Rapid Infrastructure Improvements ‘HARII’ ka Asaun Kuidadu Saúde iha Timor-Leste liuhusi mellora rápida iha infraestrutura.
“Governu hakarak ho deliberasaun ida-ne’e atu mobiliza asisténsia finaseira nesesária, iha forma empréstimu, ho objetivu mak atu hametin infraestutura saúde, nune’e mós sistema referénsia entre unidade saúde munisipál no iha sentru ospitalár sira”, Ministru Prezidénsia Konsellu Ministru, Fidélis Magalhães, informa iha Palásiu Governu.
Nia hatutan, empréstimu lahó juru ka funan no hanesan direitu ida ne’ebé país membru sira bele rekorre ba para hodi finansia sira ninia projetu sira, tanba Timor-Leste mós nu’udar país membru ba Banku Mundiál, entaun bele asesu fundu ne’e.
“Ne’e hanesan tratamentu espesiál ida ba país membru sira atubele hetan finansiamentu no empréstimu sira ne’ebé maka ho funan ki’ik ou laiha. Ne’ebe, projetu ‘HARII’ ne’e sei avansa iha tempu oin”, Fidélis dehan.
Ho autorizasaun ida ne’e, Ministru Finansa sei halo negosiasaun no bainhira parte rua konkorda ona maka ne’e sei aprezenta fali iha Konsellu Ministru.
Jornalista: Antónia Gusmão
Editora: Maria Auxiliadora
