Programa Movimentasaun Hafoun Aldeia iha Baucau seidauk finaliza
BAUCAU, 20 fevereiru 2023 (TATOLI) – Implementasaun Programa Movimentasaun Hafoun Aldeia (PMOHA) tinan-2022 nian iha munisípiu Baucau seidauk finaliza.
Diretora Apoiu Organizasaun Naun-Governamental Munisípiu Baucau, Maria Evelina de Fátima Guterres, esplika, programa refere hanesan atividade pilotu ne’ebé implementa iha suku rua hanesan suku Buibau, aldeia Buibau, suku Samalari, aldeia Samalari, postu administrativu Baucau Vila.
“Ita implementa iha tinan klaran 2022 nian, progresu iha suku Buibau atinje tiha ona pursentu 80, Samalari iha perturbasaun tanba klima entaun foin atinje pursentu 25,” nia ko’alia iha Vila Nova, segunda ne’e.
Objetivu hosi implementasaun hosi programa refere atu haforsa grupu sira iha futuru nune’e bele halibur hamutuk hodi halo atedendimentu ba komunidade iha kada aldeia.
Autoridade munisípiu Baucau aloka orsamentu ba komunidade hodi implementa iha programa refere iha kada aldeia hamutuk rihun $20 hodi konstrui uma kompostu hosi hariis-fatin, dapur, sala-rua hodi utiliza ba atendimentu.
“Ita hakarak programa ne’e labele hapara, maibé kontinua hafoun hotu ita-nia aldeia sira iha territóriu laran, liuliu iha munisípiu Baucau,” Maria Guterres akresenta.
Orsamentu Jerál Estadu (OJE) tinan-2023, Autoridade Baucau hetan alokasaun orsamentu hamutuk rihun $60 no tuir planu sei implementa iha aldeia tolu ne’ebé sei hili área uza sistema randaun.
Jornalista : Natalino Belo
Editór : Evaristo Soares Martins
