DILI, 20 fevereiru 2023(TATOLI) – Diretór Nasionál Saúde na Família iha Ministériu Saúde, Vitór Martins, dehan programa Saúde na Família la’o di’ak nafatin iha teritóriu nasionál. programa ne’e ho objetivu atu hakbesik atendimentu saúde ba komunidade sira.
“Iha tinan 2015, ita hahú halo estratejia foun atu halo vizita Saúde na família no konsegue rejista ita nia populasaun iha Timor-Leste”, Vitór Martins, dehan iha JL VILLA, ohin.
Nia informa, husi tinan 2022, MS hahú implementa planu no programa Saúde na Família katak nafatin tama sai uma hodi halo atividade ba atendimentu komunidade sira liuliu integra autoriedade lokál sira hanesan xefe suku no xefe aldeia atu bele fó informasaun di’ak ba sira nia komunidade atu simu atendimentu husi saúde sira.
“Atividade ida ne’e, ita la’o nafatin tanba liga ba kuidadu saúde primariu sira liuliu iha postu saúde sira iha suku, entaun profisionál saúde iha misaun atu lori saúde besik liután ba komunidade ne’ebé presiza ita nia tulun”, nia esplika.
Nia hateten, profisioál saúde la’os hein de’it iha sentru saúde sira maibé tenke to’o iha suku no aldeia atu bele fo atendimentu ba komunidade sira.
“Ita la’os hein de’it iha sentru saúde maibé ita tenke la’o to’o suku hodi fo atendimentu ba komunidade sira tanba dala badak sira sofre moras maibé la iha kbiit atu asesu ba fasilidade saúde maibé ho atividade Saúde na Família bele fó atendimentu ba sira liuhosi médiku, enfermeiru no parteira sira ne’ebé mak iha responsável ba ida ne’e”, nia afirma.
Atividade Saúde na Família ida ne’e, la’os vizita uma-kain de’it maibé bainhira identifika ona moras, sira halo kedan atendimentu imidiata, exemplu; iha pasiente tuberkuloze ida, entaun sira halo ezaminasaun kedas depois halo referál mai iha munisípiu hodi halo atendimentu ne’ebé di’ak liután.
Jornalista : Felicidade Ximenes
Editór : Zezito Silva
