Fulan ida tan, kompañia finaliza ona estudu DED ba merkadu munisipál tolu
DILI, 21 fevereiru 2023 (TATOLI)— Vise Ministériu Turizmu Indústria, Domingos Lopes Antunes, hateten, prosesu dezenvolvimentu merkadu munisipál, Governu kontrata ona kompañia Mainalo Unip,Lda hodi halo Detalladu Enjináriu Dezeñu (DED) ba merkadu munisípal tolu.
“Iha tinan kotuk ami hahú prosesa estudu viabilidade no Detalladu Enjináriu Dezeñu ba merkadu munisipál tolu hanesan Lautém, Baucau no Ermera. Ha’u hanoin fulan ida tan ita bele konklui ona estudu DED ne’e,” Domingos Lopes Antunes dehan ba jornalista iha Bebora, Dili, tersa ne’e.
Nia dehan, bainhira estudu DED ne’e hotu ne’e, mak sei lori ba iha konkursu públiku.
“Prosesu aprovizionamentu sira ita hotu hatene bainhira estudu viabilidade no DED hotu ona. Maka, kompañia aprezenta ona relatóriu ikus mai ita bele ba konkursu públiku no prosesu ba konstrusaun atuál,” membru Governu ne’e hateten.
Vise MTKI ne’e dehan, iha konkursu públiku kompañia manán na’in iha ona, no Governu iha planu kontinua halo estudu viabilidade ba merkadu sira seluk hanesan iha Loes, Manatuto, Ainaro no Maliana.
“Planu sira ne’e ami aseita ho Konsellu Administrativa Fundu Infraestrutura (KAFI). Tanba estudu viabilidade no DED ba munisípiu tolu Lautém, Baucau no Ermera ne’e sai hanesan protativu ba munisípiu sira seluk,” nia hateten.
Merkadu munisipál ne’e rasik, importante tebes tanba hanesan sentru komersiál infraestrutura ida ne’ebé reprezenta munisípiu ida, tuir karakterístika munisípiu nian.
“Tanba nia infraestrutura ne’e sei halo merkadu sira ne’e seguru mós liu, jestaun di’ak konfortavél atu ema ba merkadu. Ida ne’e mak prinsípiu sira ne’ebé ita uza. Nune’e, merkadu sira ne’e ita sei harii iha komunidade nia leet,” nia dehan.
Merkadu munisipál ne’e rasik, hotuhotu akompaña iha lei poder lokál vigór ona. Merkadu munisipál ne’e rasik la’o sei jere hosi munsípiu no Governu só haree de’it mak infraestrutura ho nia estratéjiku merkadu munisipál nian.
Orsamentu estudu viabilidade ba munisípiu tolu ne’e hamutuk $300.000 to’o $400.000 maibé ba ninia konstrusaun n depende ba Bill of Quantities (BoQ).
Jornalista : Arminda Fonseca
Editora : Armandina Moniz
