Janeiru : Klínika Bairo Pite rejista moras ISPA hamutuk 354
DILI, 21 fevereiru 2023 (TATOLI) – Diretór Klínika Bairo Pite Inacio do Santos, informa iha fulan janeiru, Klínika Bairo Pite rejista moras Infesaun Vias Respitóriu Aguda (ISPA) hamutuk 354.
“Iha fulan janeiru, ita rejista moras ne’ebé makas liu mak Infesaun Vias Respitóriu Aguda (ISPA) hamutuk 354, moras ne’e afeta ba labarik no mós ema boot”, Inacio do Santos, dehan iha nia kna’ar fatin Bairo Pite, ohin.
Nia hateten, moras ISPA ho númeru boot tanba haree ba klima, hanesan tempu udan depois bailoron, entaun afeta ba populasaun sira hetan moras ida ne’e.
“Atu halo prevensaun ba moras ne’e mak presiza uza maskara hodi prevene husi rai rahun sira ne’ebé mak iha”, nia informa.
Nia esplika, iha janeiru, klínika rejista inan isin rua sira ne’ebé mak halo tratamentu iha ne’e hamutuk 310 depois rejista mós moras kulit hamutuk 143.
Klínika Bairo Pite rejista moras diarea hamutuk 54 liuliu ba labarik sira tinan lima mai kraik no mós asidente siras seluk hanesan monu iha servisu fatin, iha uma hamutuk 37 no asidente tráfegu hamutuk 21.
“Ami mós rejista pasiente dentaria ne’ebé halo tratamentu iha ne’e hamutuk 563, durante fulan janeiru”, Inacio subliña.
Entretantu, klínika iha fasilidade no medikamentu ne’ebé sufisiente hodi fó atendimentu ba pasiente sira ne’ebé mai halo tratamentu.
Jornalista : Felicidade Ximenes
Editór : Zezito Silva
